Real Kashmir khelhpui duh Bengaluru

Bengaluru FC neitu Parth Jindal chuan Real Kashmir nen, Srinagar khawpui ngeia friendly match khelh a pawi tih loh thu a sawi. Real Kashmir pawhin Bengaluru khelhpui an châk thu sawiin March-a friendly match khelhpuiah an sawm. 

Real Kashmir hi tun hnaia Pulwama-a firfiak chetna avangin Minerva Punjab leh East Bengal-te chuan an tlawh duh lo.

Minerva hi Thawhṭanni chawhnu khan Real Kashmir khelmuala lenglut tur an ni a, mahse sahimna ngaihtuah vanga an kal theih loh thu sawiin an kal duh lo. 

He thu buatsaih a nih lai hian All India Football Federation lamin engtin nge hma an lak dawn a la hriat loh a, Minerva hian AIFF hi Delhi High Court-ah an khing a, February 22 khian an thubuai hi ngaihtuah tur a ni. 

East Bengal pawh vawiin chawhnu hian Kashmir-ah inkhel tura kal tura beisei an ni a, mahse inkhelhna tur hi a hmun sawn an dil - he boruak karah hian Real Kashmir tan Parth Jindal-a'n thawm a rawn nei a, Bengaluru-in Srinagar-a zin an pawitih loh thu hi a sawi a ni.

Bengaluru hian Indian Super League-ah season tawpah semifinal an khel dawn tih a chiang tawh a, zanin dar 7:30 hian anmahni ang thoa a sang pali zinga tel chiang tawh FC Goa nen an inkhel ang.