Arsenal tan goal khung ngei a ngai

Europa League last 16 lut turin Arsenal tan kawng awlsam zawh theih a ni tawh lo, zanina an mikhual BATE Borisov paltlang tur chuan goal khat aia tam an khung ngei a ngai tawh - an intawn hmasak ṭumin 1-0 in an tlawm haw a ni.

Zanin dar 11:25 hian Emi­rates Stadium-ah Belarus cham­pion hi an lo mikhual let ve thung dawn a, manager Unai Emery-a'n a thlamuanpui ṭhin 'fans' puihna hmangin an leh­thal thei a ngem tih chu fiahin a awm dawn. Chelsea erawh khualmualah Malmo FF 2-1 a an hneh tawh avangin zanin ah hna a hautak nep deuh ang.

Borisov Arena-a an in­khelh ṭumin hun tawp dawn­ah Alexandre Lacazette chu hnawhchhauh a ni a, Lyon striker hlui hian goal an mamawh laia a ṭhiante chhuah­san chu hrehawm a tih thu a sawi chhuak hial. Zanina a inlan thei lo chhunzawm tur hi Gunners tan channa a ni dawn a, chutih rualin striker hriam zawk Pierre-Emerick Auba­meyang a la awm avangin hlauhthawn lutuk tur a la ni lo.

Arsenal hian kartawpah Southampton an mikhual zui dawn a, hei vang hian Emery tan player siksawi thiam a ngai dawn. Petr Cech-a'n goal a veng chhunzawm dawn a, Germany kee­per Bernd Leno chu Saints hma­chhawn turin a inlan thung ang.

Spanish manager Emery-a'n Aaron Ramsey leh Mesut Ozil te a chhawr dawn em tih hriatthiam a har a, anni pahnih hi an inlan a nih chuan danglamna siam thei an ni, player naupang zawk te aiin tawn hriat an neih ṭhat bakah an 'class' a sang zawk - chutih rualin nakin hun thlir chungin a awltir leh mai thei bawk.

Defender Sokratis Papasta­tho­poulos hliam a dam tawh a, Greek international hi Laurent Koscielny nen tlarhnung laiah an awm a nih chuan Gun­ners tana thlamuan thlak tur a ni dawn, wing back Sead Ko­lasi­nac chu goal nawr leh a ven­him kawnga mi pawimawh a ni leh ang.

An intawn hmasakin chak lo mah se Unai Emery a zawm lo, "Minute 90 chauh kan la inkhel a, a chan­ve chauh a la ni. Ka naute ka ringtawk a, inbuatsaihna kan neih ngawrh hle bawk, tun ṭumah chuan Emi­rates Stadium a nih tawh avangin result a danglam tawh ang.

"Hnehna chang tur chuan goal kan mamawh tih kan hria, a hma aia na zawkin kan nawr dawn. Kan khelmualah chuan engtik lai mahin fans an chhe ngai lo, tun ṭumah pawh hian kan thawh leh theih nan theihtawp min chhuahpui ang," tiin a sawi. Season hmasa khan Europa League group stage-ah BATE hi an mikhual ṭumin 6-0 ngawtin an sawp tawh a, beiseina an nei sang hi a mak lo.

Kum 47 mi Emery hian Sevilla a enkawl laiin Europa League hi a kum zawnin ṭum thum a champion pui thei a, North London hi season thara Champions League khelh pui tur chuan league-a palina chin nih emaw Europa League nomawi chawi pui tal a ngai.

Tun hnaiah Chelsea an che fuh hleithei lo a, Premier League-ah Manchester City lakah an mualpho bakah nomawi an kawl mekna FA Cup aṭangin Manchester United hneh loin an tla bawk. Blues manager Mau­rizio Sarri dinhmun a nghing tih thlenga sawi a awm mek.

Chelsea captain Cesar Az­pili­cueta chuan an dinhmun ṭhat tawk loh thu a hre chiang a, hun harsa an tawh mekna lak aṭanga an thawhchhuah thuai a pawimawh thu a sawi; zanin dar 1:30-a Malmo an mikhual hunah chak an duhna a sang dawn hle.

Spain international Azpili­cueta chuan, "Season tawpah nomawi nei chung ngeia hun tawp hman kan duh, chuvangin Europa League-ah tlang ngei kan tum a, chumi hnuah Pathianni zana Manchester City nen Lea­gue Cup final kan khelh tur kan ngaihtuah zui ang," tiin a sawi.

Stamford Bridge-a inkhel tur an nih bakah Blues hian khualmualah goal hnih an neih tawh avangin an dinhmun a ṭha. Manager Sarri tan Man City nen an inkhelh zui tur ngaihtuah chungin player ṭha ṭhenkhat khek theihna hun a ni dawn, chutih rualin chak lo thei an ni tih erawh an hriat tel a ngai.

Blues forward Pedro chuan, "Kan tan chuan Europa League champion a pawimawh, chumi tur chuan Malmo kan hneh phawt a ngai. Chumi hnuah City nen nomawi kan inchuh zui ang, match pahnihah hian chak lo ni ila chuan demna chi tinreng kan dawng dawn. Hnehna kan chang a nih erawh chuan team ṭha kan nih zia hi an sawi nawn leh ṭhin ang," a ti.

Italian manager Sarri hi Napoli a enkawl lai chuan a naute khelh ṭhattir viau mah se nomawi a la chawi ngai lo, English club a enkawl hnuah hlawhtlinna lian chan theihna hun a nei hnai a, tun hi fimkhur zual hunlai tak a ni.