Messi telna Barcelona-in goal khung lo

Champions League last 16-ah Lyon chuan an mikhual Barcelona an chelh a, Parc Olympique Lyonnais-ah goal lut loin an inṭha ṭhen.

Thawhlehni zan inkhelah Catalan club hian vawi 25 zet shot an nei chungin goal khat mah an khung lo a, Lionel Messi tiamin Barca player ke a hmui lo. 

Second leg hi Nou Camp-ah March 13 zanah khelh a ni dawn a, Barcelona hian away goal an neih loh avangin chesual thei dinhmunah an ding.

Ernesto Valverde chuan tlarhmaah Messi, Luis Suarez leh Ousmane Dembele te bul a ṭan tir a; Phillipe Coutinho erawh mamawh huna lut turin bench-ah a awm.

Barcelona hi quarterfinal lut tura rinkai an ni a, Lyon nen pawh fuh an nih hian fixtures awlsam zinga ngaih an ni. Amaherawhchu tun season-a Manchester City leh Paris Saint-Germain hneh tawhtu Lyon hian player kima khel Catalan club hi an chelh.

Lionel Messi chu ṭum dang ang thoin buaipui tham a ni a, ṭum dang ang thoin ven bik a ni a. Inkhelh ṭantirhah pawh an um dul dul hnuah box pawn chiahah an titlu a, a thiam zia leh ṭhat zia hmuh hmaih rual ni lo mah se a freekick pet danin a dinhmun a sawifiah.

Argentine forward hian a freekick pet hi ho lam takin crossbar chungah a pet a, Lyon nen hian vawi kua lai goal attempt nei mah se goal khat mah a khung lo. Tun season bikah goal khung si loa attempt nei tam ber record Luis Suarez leh Cristiano Ronaldo te siam chu a nih rual a, inchhuanna chi a ni lo.

Barcelona player ṭha dang Suarez pawhin mawhphurhna a la thei bik lo a, Uruguayan forward hian khualmuala Champions League inkhelah minute 1508 goal a khung tawh lo. 

Suarez hian minute 90 chhung a khel a, Spanish media lam chuan manager Ernesto Valverde chu Uruguayan forward la chhuak ngam loah puhin an dem thung.

Barcelona hian Philippe Coutinho te an luhtir hnuah pawh goal an khung thei chuang lo a, vawi 25 zet goal shot an neih erawh engmah loah a thamral. Catalan club hi an mualah chuan goal khung hi an harsat lo a, Sevilla nen Copa del Rey-a an inkhelh ṭum pawhin vawi 20 shot-ah goal ruk khung thei an ni.

Barca hian Champions League knockout stage chinah chuan match hnuhnung parukah (D2 L4) chak hmel an hmu a, chung zinga match ngaah chuan goal an khung lo.

Lyon hian Barca lakah ball chang tlem zawkin inkhelah pawh hneh lo zawk deuh mah se chak thei dinhmunah an ding tho. 

French club tana Martin Terrier-a'n box pawn aṭanga a pet chu Barca keeper Marc-Andre ter Stegen-a'n khawih per hmain mikhual team hi crossbar-in a chhan. Lyon hian counter attack hmangin an nawr let ngam a, Memphis Depay leh Houssem Aouar tn goal khung theihna hun ṭha an hlah.

Amaherawhchu inkhelh chhung zawngin target-ah vawi hnih chiah an pet a, chu pawh first half-a an pet a nih avangin statistics aṭanga thlir chuan Barcelona an chelh hi an vannei takzet a ni.

Lyon coach Bruno Genesio chuan, "Tun aia la khel ṭha thei kan ni. First half-ah goal khung theihna hun ṭha kan hlah a, second half-ah goal khung theihna tur hun kan pe tam mah mah bawk. Engpawh chu ni se quarterfinal lut thei kan la ni," tiin Nou Camp-ah result ṭha zawk an la hlawhchhuah theih thu a sawi.

Champions League-ah hian away goal rule an hman avangin Lyon hian goal an khung hrim hrim chuan Barcelona tan a aia tam zel khung a ngai tawh ang.

Barcelona coach Ernesto Valverde chuan, "Kan mualah kan ṭha tih chu zep rual a ni lo a, amaherawhchu khualmuala 0-0 a inhnehtawk chu hlauhawm. Nou Camp-ah min ṭantute puihna kan mamawh lehzual dawn a, quarterfinal hi ban phakah a awm," tiin knockout stage an luh ngei a beisei thu a sawi ve bawk.