Khedira inkhel thei rih lo

Juventus midfielder Sami Khedira chu a lungphu mumal lo vangin enkawl a ngai a, nizana Atletico Madrid nen Champions League last 16 an khelh ṭumin a inlan ve thei lo, a chawlh chen tur erawh hriat a la ni lo.

Kum 31 mi Khedira hian kuminah hliam a nei ngun a, Germany international hi a dam chhunah khel ṭha ṭhin mah se hun a nei tam lo - inelna hrang hrangah match 15 chiah a la inlan a ni.

Italian champion chuan thuchhuah siamin, "Sami Khedira chu enkawl a ngaih avangin Turin-ah a awm, a hriselna dinhmun a chian loh avangin tun dinhmunah chuan inkhel turin a inpeih rih lo a ni," tiin a sawi.