United tan City aiin Liverpool a lian zawk - Scholes

Paul Scholes chuan a club hlui Manchester United tan chuan Manchester City aiin Liverpool nena an inkhelhin boruak a lian zawka a ngaih thu a sawi.

United hian February 24 zan dar 7:35 hian Old Trafford-ah Liverpool an mikhual dawn a, Premier League nomawi beisei Jurgen Klopp-a hote leh Champions League khelh tum Ole Gunnar Solskjaer hote inkhel tur hian ngaihven a hlawh hle.

Paul Scholes chuan, "English football-ah chuan Manchester United leh Liverpool inkar boruak aia lian a awm ka hre lo. Chutihrualin Man City hi tun ang zela an che ṭha a nih chuan kum engemaw hnuah chuan a danglam thei ang," tiin a sawi.

Premier League awm hma hian Liverpool hi English champion vawi 18 an ni tawh a, club ropui ber tiha sawi ṭhin an ni. Amaherawhchu Sir Alex Ferguson hnuaiah United-in Premier League nomawi 13 an chawi a, English champion vawi 20 an nih tak avangin Reds aiin an chungnung zawk.

United legend Scholes chuan, "Liverpool-in United record hi khum ngei an tum a, United-in an phal dawn lo. Chuvangin Pathiannia an inkhel tur pawh hian ngaihven a hlawh em em a ni," tiin a sawifiah.