Number 1 hnuah Osaka chak lo

Naomi Osaka chuan hmeichhe tennis world number 1 a nih hnua a match hmasa ber chu Thawhlehni zan khan a khel a, Japanese nula hi Kristina Mladenovic hneh loin Dubai Tennis Championship aṭanga vuak tlak nghal a ni.

US Open leh Australian Open champion Osaka hi darkar khat leh minute ruk chhungin 6-3, 6-3 in a chak lo. Number 1 a nih thar bakah kar hmasa lawkah coach Sascha Bajin nen an inṭhen avangin tun ṭum a inkhel hian ngaihven a hlawh zual a, chak loh hi atan chanchin lawmawm lo a ni zual.

Kum 21 mi Osaka chuan, "Mipuiin min thlir bik riau niin ka hria a, ka tan chuan tun ṭum chu a harsa deuh. Mahse, hei hi ka tawpna tur a ni lo, hun rei lote chhungin ṭha takin khelh chhuah leh ka tum ang," a ti a, coach nen an inṭhen chungchang an zawhna chu chhan ngai a tih loh thu a sawi bawk.

Inkhel dangah Wimbledon vawi hnih champion tawh Petra Kvitova-i'n set a hloh hmasak zet hnuah Katerina Siniakova 6-7 (3-7), 6-4, 6-4 in a hneh. Grand Slam vawi thum champion tawh Angelique Kerber chuan a khingpuiin set point vawi hnih a hmuh tawh inchhanhim lehin Dalila Jakupovic chu 7-6 (7-4), 6-3 in a lehthal.

Russian nula Viktoria Kuzmova-i'n seeded pasarihna Kiki Bertens 6-2, 4-6, 7-6 (8-6) in a hneh a, player langsar Bertens a chak loh lai hian Sofia Kenin erawhin 6-3, 2-6, 6-4 in Daria Kasatkina a hneh thung.