RFL Plastics MFA Fustal League Dinthar nge tlang dawn Ramhlun Venglai?

RFL Plastics MFA Futsal League chu Electric Veng YMA Indoor Stadium-ah khelh chhunzawm zel a ni a, zanin hian group A team ten group stage hnuhnung ber an khel dawn. Chhiarkawp dan hmanga chhutin Dinthar club Lawmna FC leh Ramhlun Venglai FC ten hmunruak pakhat an inchuh ang.

Thawhlehni zanah Saron Vengin an elpui FC Ramhlun Venglai an hneh a, he hnehna avang hian quarterfinal an lut tiin a sawi theih. Futsal League-ah hian team pahnih point a inang a nih chuan head to head en tur a ni a, Saron Veng hian match hnuhnung berah Armed Veng South hneh lo pawh ni se RVL an hneh avangin head to head-ah an chungnung.

Point 12 hmu zingah Lawmna FC an tel ve a nih pawhin goal difference-ah RVL a chhiat fal avangin Saron Veng dinhmun a ṭha.

Lawmna FC erawhin an match hnuhnung berah Chanmari Zothan Futsal hneh mah se head to head-ah Ramhlun Venglai an tluk loh avangin tla thei an ni. Dinthar club hian an match hnuhnung berah team ṭha Laipui FC an hneh lo a, Saron Veng FC-in point la hmu lo AVS laka point an hlawhchhuah hrim hrim a, Ramhlun Venglai an chak si chuan Lawmna FC hi tla tur an ni thung.

Chutihrualin dinhmun chhe ber erawh Ramhlun Venglai an ni a, tla tawh zinga mi an veng ṭhenawm Ramhlun South FC laka point thum an hmu lo a nih chuan an tla dawn.

Match hnihnaah RVL hian hnehna an chang a nih chuan zanin group A inkhel boruak a nung dawn. He group-ah hian Laipui FC leh Chanmari Zothan Futsal te chu an tling tawh a, Saron Veng FC chu quarterfinal lut turin an dinhmun a ṭha a, table hnuai lama awm pathum Ramhlun South FC, Bawngkawn FC leh Armed Veng South te erawin knockout stage an lut thei tawh lo.