VAR leh Juve dan rual loh Atletico

Video assistant referee hmang-in Atletico Madrid chu an goal khung leh penalty pawm sak ni lo mah se Juventus laka an chakna dang turin a tawk zo lo. 

Nilaini zan khan Champions League last 16 first leg inkhelah Atletico hian an mikhual Juventus chu 2-0 in an hneh a, Madrid khawpuiah Italian champion an hawihai. 

Atletico Madrid tan Jose Maria Gimenez leh Diego Godin ten goal khat ve ve an khung a, Juve lamin a chhanletna tur an neih loh avangin second leg atan an hmabak a hautak sawt. 

Juventus-in Champions League nomawi chawi duha an lakluh Cristiano Ronaldo meuh pawhin a team a chhanhim thei lo a, last 16-a European football an mangṭhana chance a sang ta hle. 

Atletico tan Diego Costa leh Thomas Partey chuan tun inelnaa an yellow card pathumna an hmuh avangin March 12 zana second leg an khelh hunah an inlan thei dawn lo a, Juventus lamah left-back Alex Sandro a inlan thei dawn lo bawk. 

Si hnih fai meuha hnehna an chan hnu pawha 'an vanduai' tia an chanchin sawi a ṭul tawh chuan Atletico-in Juventus an thunun hneh hle tihna a ni a, 2-0 a an chak chung hian an vanduai tel tak tak!

Mulaneitu team hian Diego Costa hmangin penalty an hmu zet a, hliam vanga a chawlh reng hnua December 2 hnua a vawi khat nana inkhel bul ṭan striker hi Mattia de Sciglio chuan a ti tlu. 

Mahse, referee-in VAR a rawn hnuah a thutlukna a thlak leh a, De Sciglio foul-na hi penalty area pawn nia hriain freekick a pe leh ta zawk - Costa hian goalkeeper chauh hmachhawn chungin pet goal-na hun a nei zui a, a chhawr thei lo.

Costa thlak tura luhtir Alvaro Morata chuan Atletico tan rawn tauh lut mah se he goal pawh hi VAR rawn a nih hnuah pawm a ni lo - Juve striker hlui hian ball a tauh hmain Giorgio Chiellini a nam tel niin a lang a, goal atana pawm loh phah nan chuan a nem hret niin a lang.

Morata hi Madrid derby-ah a goal khung chu VAR hmanga ennawn a nih hnuah pawm a ni tawh lo a, Juve lakah a goal khung pawm a ni leh ta lo bawk.

Atletico-in hmahruaina hun ṭha an neih vawi hnihah VAR hmanga hnawl ni mah se dan reng theih an ni chuang lo a, minute 78-naah Gimenez hmangin goal hmahruai an khung ta nge nge. 

Gimenez goal khung pawh hi Morata thawhchhuah a ni. Chelsea aṭanga Atletico pantu striker ball tauh hi Atletico striker hlui Mandzukic chuan a kein a lo dang a, a per lehlam hi Gimenez chuan a pet goal. 

Atletico hian an la duhtawk mai lo. Goal an khung aṭanga minute ngana lekah Diego Godin chuan an goal hnihna a khung zui a, Juventus tan mikhualna ramah comeback a beiseiawm tawh lo. 

Inkhel pumpui thlirin Juventus hian chance hlauhawm tia sawi tur an nei meuh lo a, first half-a Ronaldo freekick kawh zet Jan Oblak-a'n ṭha zeta a lo dan chu an chance ṭha ber anga chhal theih a ni. 

Italian football-ah chuan Juventus hi tuma chuh rual lohin roreltu an ni a, Serie A roreltu ni turin Ronaldo an mamawh belh lo - pound maktaduai 99-a Ronaldo an lakluh khan an tum a chiang a, chu chu Champions League nomawi chawi a ni. 

Mahse, season ruk chhung a zawna Champions League top scorer nichunga goal 121 khung tawh forward hian Juventus mamawh ang a la thlen lo.

Ronaldo hian Juve tan European football match ruk a khelhah goal khat chiah a la khung a, a match hmasa bera Valencia an hmachhawn ṭumin hnawhchhuah a ni bawk.

Heng zawng zawng thlir chuan Juventus tan Ronaldo lei a 'man' lo a, an lei chhan ang ngeia a theihna lantirna chance kar thum hnuah a nei leh dawn - first leg-a a lansarh berna chu Champions League nomawi panga a chawi tawh tih lantir nana Atletico fans lam hawia a kut a phar kha a ni!

Inkhelh zawhah Atletico Madrid manager Diego Simeone chuan ngaih kawih theih tak turin an fans lam hawiin chak a lawm a, sawi zui pawh a hlawh hle. 

Mahse Simeone chuan, "Kan fans lam hawia lawm ka ni a, Juven fan-te tih elna a ni lo. Miin an ngai hua a nih chuan ngaihdam dil ka hreh lo a, mahse kan huaisen a, mipa kan ni, tih lantir nan khati khan ka lawm a ni," tiin an chak a lawm dan chungchang a sawi. 

Juventus coach Massimiliano Allegri chuan, "Simeone chak lawm dan kha ngaih huat tur awmin ka hre lo a, thil thleng pangngai ve mai a ni," a ti.

Allegri chuan inkhel thlir let zuiin, "Ronaldo khan a khel ṭha a, team kan nihna angin second half kha chu kan khel chhe vek a ni," tiin Portuguese forward chu dem bik tur a nih loh thu a sawi.