Mizoram 1-0 Manipur

2nd Dr T. Ao North East International NEC Gold Cup Under 21 Football Championship chu Guwahati-ah khelh chhoh mek a ni a, nimin khan Mizoram chuan an match hmasa berah Manipur chu F. Lalnuntluanga goal hmangin 1-0 in an hneh.

Vawiin chawhnu dar 1:30 hian Mizoramin an group hmahruaitu Meghalaya an hmachhawn dawn. Santosh Trophy qualifying round-ah Mizoram senior team-in  Lammualah Meghalaya hneh loin final round an lut lo a, Under 21 team hian phuba lak sak an tum dawn a ni.

Mizoram manager Peter Lalzawmliana chuan, "Kan match hmasa ber a nih avangin Manipur nen hian kan khel ṭha tawk lo a, chance ṭhahnem tak kan hlah. Goal chhuah lo mah ila kan tlarhnung pawh a khawng ṭha lo a, Meghalaya nen ṭha zawka khelh kan tum ang," tiin Vanglaini a hrilh.

Nimin inkhelah hian minute 17-naah Mizo winger Tluanga hian Manipur right back a bum hnuah ṭha zetin a khung a, amaherawhchu hun tawp hma hretin midfielder K.C. Larchhuakmawia leh Manipur player chu khelmuala an intihbuai avangin hnawhchhuah a ni a. Chanmari FC midfielder KC-a hian Meghalaya a hmachhawn thei lo ang.