Mbappe-a'n goal 20 a khung ta

22nd February, 2019

Kylian Mbappe chuan tun season kal laiah league goal 20 a khung tling a, Paris St-Germain rawlthar duhawm hian hetiang zat goal khung tur hian match 19 bak a mamawh lo.

Nilaini zan French Ligue 1 inkhelah PSG hian an mikhual Montpellier 5-1 in an sawp - French champion tan hian Layvin Kurzawa, Angel di Maria, Christopher Nkunku leh Vitorino Hilton (own goal) ten goal an khung hnuah Mbappe-a'n a hnu a khar a ni.

Kum 20 mi Mbappe hian 2016-17 season khan AS Monaco tan league goal 15 khungin nomawi a chawipui. PSG a pan hnua a season khatnaah goal 13 khung lehin, tun season kal laia inelna hrang hrangah erawh goal 25 a khung tling der tawh.

Mbappe faktu Tuchel

PSG manager Thomas Tuchel chuan, "Montpellier khan min nawr tum ṭhin mah se kan chhu chat thei a, kan nawr let khan hmun ruak tam tak kan hmu thei bawk. Goal nga neih hi a chhe lo a, chutihrualin ka naute theihna san zia ka hriat erawh chuan kan khelh dan hi a la tawk lo.

"Tun hnaiah Mbappe a khel ṭha tluang a, ani hian Neymar leh Edinson Cavani awm loh lai pawhin a hna thawh tur ang chu tlin takin a thawk reng tho," tiin French rawlthar a dahsang thiam hle.

Footballer manto ber Neymar hi hliam vangin a inkhel thei lo mek a, tun dinhmunah an ram Brazil-ah inenkawl turin a haw mek. Striker Cavani pawh hliam vang bawkin Manchester United nen an inhmachhawn ṭum pawhin an chhawr thei lo tawh bawk a ni.

PSG chungnung

Ligue 1 champion hian match 24 an khelh aṭanga point 65 hmuin a chung berah an awm chhunzawm a, pahnihna Lille aiin point 15 ngawtin an sang fal; Tuchel-a naute hian match khata an khelh tlem zawk bawk avangin an nomawi humhim ngei tura ngaih an ni.

League leh French Cup-a an dinhmun a ṭhat tawh bakah Champions League-ah pawh quarterfinal lut turin kawng dik an zawh mek, khualmualah Manchester United 2-0 in an hneh tawh a, second leg-ah an tan hna a awlsam tawh ang.

Nilaini zan inkhel dangah table mawngphaha awm Guingamp chu Bordeaux nen goal awm loin an inhnehtawk ve bawk. Team talbuai AS Monaco chu point 22 hmuin 16-naah an kang chho ve tawh bawk a ni.