Last 16-ah Sevilla an lut

Europa League vawi nga champion tawh Sevilla chuan tun season-ah last 16 lut hmasa ber an ni. Spanish club hian Nilaini zan khan an mikhual Lazio 2-0 in an hneh a, inkhel hmasa nen belhkhawmin 3-0 in an tlang.

La Liga club hian first leg-ah hehna an chan tawh bakah, second leg hi an khelmuala khelh a an nih avangin an dinhmun a ṭha tawk hle. Wissam Ben Yedder leh Pablo Sarabia te goal hmangin nuamsa takin hnehna an chang a ni.

Mualneitu Sevilla midfielder Franco Vazquez chu minute 60-naah yellow card pahnihna hmuh vangin hnawhchhuah a ni a, mikhual lamin tam zawk an nihna an chhawr ṭangkai thei chuang lo. Minute 10 hnuah Lazio defender Adam Marusic chu hnawhchhuah a ni ve leh bawk.

Spanish league-a pali na ni lai Sevilla hi Unai Emery-a'n a enkawl laiin a zawnin ṭum thum an champion thei, no mawi an chawi hnuhnung ber chu 2016 kha niin final-ah Liverpool an hneh a ni.

Sevilla manager Pablo Machin chuan,"Round of 32 inkhel tur pawh a nih khan kan hmaah Lazio an awm a, mi tam takin tla mai turah min ngai. Mahse, tunah chuan goal chhuah lo in kan tlang ta zawk, last 16-ah pawh team ṭha hmachhawn ngam tura kan inpeih a pawimawh," a ti.

Nizan khan Europa League last 32 dang hi khelh a ni a, vawiin tlai dar 5:30 hian last 16 khel tur pawh zui leh tur a ni ang.