Clay court-ah Federer inkhel dawn

Season hnih chhung clay court-a a inkhelh loh hnuah Roger Federer chuan inlan a tum ve leh ta a, Swiss star hian May thlaa khelh tur Madrid Open-ah a inlan tur thu a ti chiang ta.

Kum 37 mi Federer hi a kum a tam tawh avangin inelna zawng zawngah a inlan tawh ngai lo, a inkhelh thiamna hmun grass court-a inlan a duh avangin clay-ah a inkhel lo mai zawk ṭhin.

French Open vawi khat cham­pion tawh Federer chuan, "Kum hnih hnuah ka inlan ve leh dawn, ka tan chuan thil thar a ni leh tawh dawn a, ka nghakhlel tawh angreng hle," tiin a sawi.

Madrid Open director Feliciano Lopez chuan, "Federer hi tennis player awm tawh zinga ropui ber anga sawi theih a ni, ani a rawn inlan thei tur hi kan tan chuan chanchin lawmawm a ni," a ti. Federer hian Madrid Open nomawi hi vawi thum a chawi tawh a, Spain khawpuia a champion hnuhnun ber erawh 2012 daih tawh kha a ni thung.