Highlanders an la him lo

Nilaini zan Indian Super League inkhelah NorthEast United-in hnehna chang se chuan a sang pali zinga tel chiang tur an ni a, mahse Pune City nen goal khat ve ve khunga an inhnehtawk avangin an match hnu­hnung ber an la nghah a ngaih phah.

Highlanders hian minute 47-naah Rowllin Borges hmangin goal hmahruai an khung a, goalkeeper Kamaljit Singh tihsual nangchingin Goan midfielder hian tun season-a a goal lina hi a khung. 

NorthEast hian point thum an humhim chuan semifinal an khel thei dawn tih chiang mah se an goal neih sa an humhim thei lo a, Pune City tan Adil Khan chuan minute 69-naah si phurh sutna goal hi a rawn khung - Highlanders an hawihai. 

Guwahati khawpuiah inkhel boruak a sang a, hun tawp nan minute khat chiah a awm tawh tihin NorthEast United midfielder Jose Leudo chu Diego Carlos laka a chet dan mawi lo avangin hnawhchhuah a ni a, goal dang a lut lo.

NorthEast United tan K. Lalṭhathanga chuan minute 90 a khel tluan a, bench-ah Robert Lalthla­muana a ṭhu tluan thung.  

Zaninah ISL inkhel pakhat a awm dawn a, Mumbai City chuan dar 7:30 hian ATK an lenchilh ang - hnehna an chan chuan Maharashtra club hian a sang pali zingah season an khar ang.