Shillong khawpuiah Gokulam leng dawn

I League-ah team 11 an awm a, a hnuai bera awm chu Shillong Lajong an ni. Meghalaya club chung chiahah hian Gokulam Kerala an awm ve leh a, I League mawng lam luahtu team pahnih hi vawiin tlai dar 5:00 hian an inkhel dawn. 

Shillong Lajong hian Minerva Punjab leh Churchill Brothers a zawna an hneh hnuin East Bengal leh Chennai City lakah a zawnin an tlawm leh a, Mizo tlangval Samuel Lalmuanpuia captain-na hnuaia khel team hian a mawng lam an chhuahsan hleithei lo. 

Meghalaya club hian table mawngphah chhuah­san an duh chuan an elpui Gokulam an hneh a ṭul dawn a, South Indian club hi an ngam lo a nih ngat chuan season tharah I League khelh zui zel beisei a harsa ang. 

Gokulam hi an match hnuhnung 11-ah an chak miah lo a, mahse Lajong nena an intum hmasak chuan 3-1 ngawtin an chak thung - Shillong tan lo zuam ngawt chi an ni dawn lo, tihna a ni.