Djokovic ringtu Andre Agassi

Andre Agassi chuan an ṭhat dan bera an khelh chhuah ṭheuh chuan Novak Djokovic chu khawvela tennis player ṭha ber niin a ngai a, Grand Slam vawi 20 champion tawh Roger Federer-a record pawh a khum theih mai a beisei thu a sawi.

Serbian tlangval Djokovic hian season hmasa chawhnu lam aṭangin a khel ṭha leh tawh, major tournament hnuhnung pathum Wimbledon, US Open leh Australian Open-ah te a champion vek- nomawi lian 15 a nei tawh a, a chungah hian Federer (20 titles) bakah Rafael Nadal (17) te an la awm mek.

Grand Slam vawi riat champion Agassi chuan,"Tunlaiah player an ṭha em em vek tawh a, an inel tawkin inkhel pawh a hmuhnawm thei hle. Mahse, ngun taka kan en a nih chuan Novak hian defensive leh attacking huang kan sawi kawp a nih chuan a nei ṭha ber niin ka hria."

"A kum a la tam lo a, a elpui pahnih Federer leh Nadal te aia a la naupan zawk avangin major title la hnem ber dinhmun pawh hi a la luah a nih pawhin a mak lo ang, hliam a neih loh chuan a thlen ngei pawh ka ring," tiin kum 31 mi Djokovic a dahsang hle.