Ferrari elphak a hautak dawn - Hamilton
Formula 1 driver champion Lewis Hamilton chuan season hmasa aiin inelna a hautak dawn tih a hmu thiam a, an elpui Ferrari chu nikum aiin an car a chak zawk niin a sawi.
Ferrari hian season hmasa khan champion pui tham car an nei, mahse driver Seabastian Vettel a chetsual fo bakah team lamin tihsual an nei zauh ṭhin bawk. Kuminah pawh car an nei ṭha leh hle tura ngaih a ni a, pre season test an neih ni hmasa pahnihah pawh an chungnung.
Mercedes driver Hamilton chuan, "Ferrari hian nikum ai khan car an nei ṭha zawk, kan tan chuan chona hautak leh phurawm tak a ni dawn. A lan dan chuan an ropui hle a, a pawimawh chu engtiang taka ṭha nge an nih hi kan hriatchian a ngai dawn," a ti.
World champion vawi nga ni tawh Hamilton chuan sawi zawmin, "Kan team pawhin hmasawn kan ngaihna lai kawng hrang hrangah hma kan la mek zel a, hlawhtlinna dang chan duha tuihalna kan la neih miau avangin midang tan elpui hautak ber chu kan nih chhunzawm ang," tiin a sawi.
F1 season tharah Sebastian Vettel leh Charles Leclerc ten Ferrari car an khalh dawn a, champion lai Hamilton leh Valtteri Bottas te chu tunlaia team ṭha ber Mercedes tan an tlan thung dawn - anni team pahnih hi inel na ber tura ngaih an ni.
March 17 aṭangin car intlansiakna sang ber hi neih ṭan a ni leh tawh dawn a, intlansiak hmasa ber atan Melbourne-ah Australian Grand Prix an tlan ang.