Player 10-a khel Man City an comeback

Manchester City chuan Veltins Arena-ah player 10-a khel chungin mualneitu Schalke chu 3-2 in an hneh a, second leg hi Etihad Stadium-ah khelh a ni dawn avangin Premier League champion hian Champions League quarterfinal an thlen ngei a rinawm. Amaherawhchu Pep Guardiola chuan team nem ber zinga mi Schalke nen an inkhelh tawk avangin stage sang zawk khel turin an inpeih loh thu a sawi thung.

Nilaini zan inkhelah hian English club tan Sergio Aguero goal hmangin hma hruai mah se, Schalke-in Nabil Bentaleb penalty vawi hnih hmangin an lehthal a. City defender Nicolas Otamendi hnawhchhuah a nih zui avangin Guardiola hote tan thawhchhuah a harsa sawt mah se hun tawp dawn a Leroy Sane leh Raheem Sterling te goal hmangin harsatna ruam aṭangin an tho chhuak.

Inkhel ṭan phat aṭangin Man City-in Schalke an nawr tawm a, Guardiola enkawl an nih miau avangin inkhelh kal hmang tur thui tak a hriat lawk nghal.

Minute 18-na lekah City-in goal an khung a, Aguero goal khung dan erawh Schalke tlarhnung fimkhur tawk loh vang a ni. German club keeper Ralf Fahrmann chuan defender Salif Sane chu ball pe a, amaherawhchu David Silva chuan lak khalh hmain Aguero tan a pe nghal a, Argentine forward hian goal ruakah khung.

Man City history-a goal khung tam ber Aguero hian match hnuhnung pasarihah goal 10 a khung. Season liam ta aṭanga chhutin City forward hian khualmuala Champions League inkhelah goal sarih a khung a, goal riat khungtu Cristiano Ronaldo chiah a tluk lo.

Nuam sain Man City chak tura ngaih theih a ni tawh a, thil thlen dan erawh a dang thung. Schalke wing-back Daniel Caligiuri ball pet chuan Otamendi kut a per a, Argentine defender hian a kut a la sawn hman lo a, yellow card a chawi bawk.

City defender hlui Danny Mills chuan, "Handball an tih hi ka hrefiah thiam ta hauh lo mai, Otamendi khan a awmna hmun aṭang khan a kut lak sawn a tum a, amaherawhchu goal-a ball kal tur a dang thung," tiin a sawi. 

Spanish referee Carlos del Cerro Grande pawhin corner a pe zet a, amaherawhchu VAR nen minute thumchhung an inrawn hnuah penalty a pe ta zawk. Ball hian Otamendi kut per lo se goal thei dinhmuna a din avangin referee thutlukna hi a pawmawm hle. 

Tottenham midfielder hlui Bentaleb chuan minute 38-naah penalty hi a khung a, minute 45-naah pawh penalty aṭang bawkin a khung leh bawk. City midfielder Fernandinho chuan ball tauh thei dinhmuna ding Salif Sane a man avangin penalty hi a chawi a, yellow card a hmuh bawk avangin Brazilian midfielder hi Argentine defender nen second leg-ah an khel thei lo ang.

Second half-ah Man City-in goal aiin red card an hmu hmasa a, Otamendi chuan Guido Burgstaller laka a foul vangin minute 68-naah hnawhchhuah a ni. English club tan mangchhia a thleng a tih theih a, amaherawhchu Leroy Sane leh Raheem Sterling hmangin fiahna an paltlang.

Schalke chhul chhuak Leroy Sane-a'n Man City tan inkhel bul ṭantir lo mah se minute 78-naah luhtir a ni a, Germany international hian minute 85-naah yard 30 aṭanga freekick petin goal kilah mar ṭha takin a pet lut.

Sane hian a larchhuahna Veltins Arena-ah a thiamzia a pholang nawn a, amaherawhchu amah chher liantu hre rengin a goal khung a lawm duh lo. Sane hi Man City tana a inlan hnuhnung pasarihah goal riatah (goal thum leh assists panga) a inrawlh.

Minute 90-naah Raheem Sterling chuan keeper Ederson ball petchhuah chu cool takin a khung a, Schalke-in an tamna an hmang ṭangkai thei lo a, an mualah goal thum ngawt an chhuah bawk avangin 'thilmak' a thleng a nih ngawt loh chuan quarterfinal an thleng lo ang.

Schalke head coach Domenico Tedesco chuan, "Kan fing tawk lo. Kan pass sual ṭhenkhat kha nghawng lian tak a nei a, kan tisual nawn thiang tawh lo. Kan result-ah kan lawm lo a, kha aia ṭha zawk kha kan phu a ni," tiin an goal chhuah dan chu an fimkhur tawk loh vang a nih thu a sawi.

Man City coach Josep Guardiola chuan, "Season liam ta Anfield-a inkhel ang deuh kha a ni a, an tih ṭhat vang pawh ni loin goal hnih kan khungtir a, chutihrualin kan tawp khar dan erawh a lawmawm hle. Hetiang inkhelah hi chuan player ṭha danglamna a lang ṭhin," tiin a sawi.

Pep Guardiola hote hi nomawi pali chawi vek thei dinhmunah an ding a, tun Pathianni hian Chelsea nen Wembley Stadium-ah League Cup nomawi an inchuh ang. Champions League second leg erawh March 12 zanah khelh a ni dawn a, City hian khualmualah goal thum ngawt an khung avangin goal khat leka an chak lo a nih pawhin quarterfinal an lut dawn tiin a sawi theih ang.