Sarri-a'n a dinhmun a hrechiang

Chelsea boss Maurizio Sarri chuan hnehna chan zel chu a hna humhim tura a tih theih awmchhun a nih thu a sawi. Blues hian nizan khan Europa League-ah Malmo an hmachhawn a, he thu buatsaih a nih lai hian result kan hre hman lo. 

London club hi khual-muala a zawna vawi thum zet a zawna an tlawm avangin Premier League-ah palinaah an tla thla tawh a, FA Cup aṭangin Manchester United chuan an hnawt chhuak bawk.

Tun hnai an result avang hian manager ban hreh lo tak Chelsea hian Sarri hi an ban mai a rinawm a, Pathianni zan khian League Cup final-ah Manchester City an hmachhawn dawn zui. 

Sarri chuan, "Chelsea manager hna hi rei tak chelh tur anga ka in ruahman loh chuan hna ka thawk thei lo ang. Tun dinhmunah chuan match thum emaw li tal a zawna chak a ṭul a, chu chu tihdamna awmchhun a ni," a ti.

Italian manager chuan sawi zawmin, "Fan-te an lungawi lo hi ka hrethiam a ni. Hnehna chan hi tih dan ṭhangah an nei tawh a, tunah chutiang result kan pek loh avangin an talbuai a ni. 

"Engkim thlak danglam theihna chu result ṭha tak neih chauh a ni," tiin a hmabak match zel pawimawh zia a hai lo.