Ozil hma hun a kutah a awm - Emery

Arsenal manager Unai Emery chuan tun hnaia a chhawr mumal loh Mesut Ozil chungchang an zawhna chhangin, "a hma hun chu ama kutah a awm" tiin Germany international hlui chanchin a sawi.

Kum 30 mi Ozil hian 2018 January thla khan North London club tana a contract thar a ziak a, kar khatah £350,000 zet hlawhin Gunners player zinga hlawh hnem ber a ni. Mahse, tun season chhungin Premier League match 26 an khelh zinga vawi 13 chiah inkhel bul a ṭan.

Spanish manager Emery chuan, "Training leh inkhelhna hmunah ngelnghet taka a chet ka duh, hliam emaw dam lohna nei loa a awm a ngai. A dinhmun a ṭha lo a nih chuan Mesut ṭha tak kha kan hmu thei lo a ni," tiin a sawi.

Ozil hian 2013 khan Real Madrid aṭangin pound maktaduai 42-in Arsenal a zawm a, a hun lai chuan an player manto ber niin a hlawh hnem ber pawh hi a mak lo. Amaherawhchu, hliam a neih bakah a dam pawhin Emery-a'n a chhawr ṭha duh lo, December 26 hnuah vawi khat chiah bul a la ṭan ve a ni.

Thla hmasa mai khan Emery hian a player Ozil-a'n Arsenal-ah hma hun a la neih thu a sawi a, tunah erawh a hma hun chu amah kuta awm a nih thu a sawi hian sawi zui a hlawh - season tharah a chhuak a nih pawhin a mak lo ang.