Kerber tlak niah Halep leh Kvitova chak

Dubai Tennis Cham-pionship khelh mekah champion thei tura rinkai Angelique Kerber chu third round paltlang zo loin a tla a, hetihlai hian Simona Halep, Elina Svitolina, Viktoria Kuzmova leh Hsieh Su-wei te chuan hnehna an chang thung.

Kar hmasa lawka Qatar Open final kheltu Halep-i'n a khelh ṭhat chhawm nung zelin Lesia Tsurenko 6-3, 7-5 in a hneh. Romanain nula Halep hian quarterfinal-ah chuan Belinda Bencic a hmachhawn leh dawn.

Kum 27 mi Halep chuan, "Tournament kan khelh hnem avangin taksa a chau duh, chuvangin match hi a rei lo thei ang ber zel khelh ka tum," tiin tha khek a pawimawh thu a sawi.

Grand Slam vawi thum champion tawh Kerber erawh player hriat hlawh lo Hsieh Su-wei lakah 5-7, 6-4, 6-0 in a chak lo thung. Taiwan nula Hsieh hian Kerber a hmachhawn tawhna vawi thuma a chak vawi khatna chiah a ni. Alison Riske 7-6 (7-3), 7-6 (7-5) a hnehtu Pliskova nen an inhmachhawn leh ang.

Vawi hnih a champion tawhna hmunah Svitolina pawh a chefuh zel, a vawi thum nana champion a tumna kawngah 6-1, 6-2 in Wimbledon leh French Open champion tawh Garbine Muguruza chu darkar khat leh minute hnih chhung lekin a hneh.