AIFF-in futsal team a din thuai dawn - Dinesh Nair

All India Football Federation Futsal consultant Dinesh Nair chuan, kum 2019 chhungin India ramah futsal inelna changtlung tak buatsaih a, chumi hnuah Asian Football Confederation hnuaia intihsiaknaah Indian national team tirh an tum thu a sawi.

Ni hnih chama Mizorama lo zin AIFF futsal consultant chuan nimin khan Regency Hotel-ah MFA leh MFA Futsal committee hruaitute a kawm a, AIFF-in futsal lama hmachhawp a neihte a sawi a, "Football hmasawn zelna turin futsal hi a pawimawh a, a pahnih hian ṭha taka kal kawp tur a ni. India himrei tak chhung hnufual deuh tawh mah ila, AFC rawtna angin AIFF pawhin futsal hi chak zawkin a kalpui chho dawn a ni," a ti.

Association of Indian Football Coaches-a director ni bawk Dinesh chuan, "Mizoram Football Association-in futsal ṭha taka in kalpui leh, AIFF duh anga league mumal tak in ṭan thei hi ka lawm takzet a, hetah chuan ka lo zin chhan tam zawk in lo tihlawhtling tawh a ni," a ti.

India rama state thlan bik pariatah futsal hi kalpui a ni dawn a, state league-te buatsaihin chuta a tiṭhate tan chuan India ram pum huap inelna buatsaih a ni leh ang. Hetah hian India national team tur thlan an ni ang a, chumite chuan AFC intihsiakna hrang hrangah India ai an awh dawn a ni.

Nimin tlai lam khan Electric Veng YMA Indoor Stadium-ah Coaches Orientation neih a ni a, Dinesh hian MFA Futsal League-a coach-te nen hun an hmang a ni.

Vawiin zing dar 11 hian Aijal Club-ah Futsal Stakeholders Meeting buatsaih a ni leh dawn a, futsal club aiawhte leh he lama mi pawimawhten inrawn khawmna hun an nei ang.