Thla khat vel chawl tur Khedira

Juventus midfielder Sami Khedira chu a lungphu mumal tawk lo vangin enkawl mek a ni a, Germany international hi a chawlh chen tur chiang taka sawi theih ni lo mah se thla khat chhung vel tal chu a chawlh a ngai dawn.

Kum 31 mi Khedira hi Nilaini zana Juventus leh Atletico Madrid ten Champions League an khelh ṭum pawhin a inlan thei lo tawh, a lungphu a mumal loh vang hian lu na bakah thawk lama harsatna a nei thei a ni.

A dinhmun sawiin Khedira chuan, "Min enkawlna tluang leh ṭha takin a kal vek a, hun rei vak lo ka chawlh hnuah ka rawn kir leh thuai ang," a ti. Italian champion Juventus chuan an player hi tluang taka enkawl a nih chuan thla khat hnuah an chhawr leh theih an beisei thu an tarlang bawk.