Arsenal-in pound maktaduai 72 man Pepe la dawn

Player lei nan sum an hmang hnem ngai lo a, tun nipui bazarah pawh Arsenal chu club lian dang aia che na lo zawk hle tura ngaih an ni. Mahse, Gunners hian Inrinni khan fans leh khawvel barakhaihin Lille aṭangin Nicolas Pepe chu pound maktaduai 72 zeta an lak tur thu a chiang, North London club player manto ber a ni ang.

Premier League club lei dilna zat hi French Ligue 1 club lam chuan an pawm a, season nga daih contract a ziak ang. Ivory Coast international Pepe-a agent leh Arsenal hian mimal thila inremna tihfel ngai an la nei thung - harsatna dang a awm thut a nih loh chuan tunkar tir lamah chuan a fel hman vek tura ngaih a ni.

Napoli pawhin lak tuma an dawr Pepe hma hian Gunners chuan Ligue 1 club tho Saint-Etienne aṭangin defender William Saliba chu an la tawh a, player pahnih man hi instalment-a pek tur a ni dawn. Real Madrid midfielder Dani Ceballos chu season khat chhung atan loan hmangin an hawh fel tawh bawk.

Mantes-la-Jolie, France-ah 29 May 1995 khan Nicolas Pepe hi a piang a, tunah hian kum 24 mi a ni. France rama piang ni mah se a nu leh pa hi Ivorian an nih avangin Ivory Coast tan pawh a khel thei a, African ram tan hian 2016 aṭang khan a khel ta zawk.

Club lamah chuan Angers tan match 40 a khelh hnuah 2017 khan Lille a pan a, match 74 a khelh aṭangin goal 35 a khungsak tawh. Season hmasa khan league-ah goal 22 a khung bakah ṭhiante thun tur vawi 11 a siamsak, goal khung leh assist ngah lama a tluk loh chu Paris Saint-Germain duhlai Kylian Mbappe chauh a ni!

A naupan lai, kum ruk mi chauh a nih laiin school-a an zirtirtu chuan i len hunah eng nge i nih châk? tiin a zawt a; Pepe-a’n, "Professional footballer nih ka châk," a tih chuan an zirtirtu a barakhaih chiang hle, mahse zirtirtu hian a naupang chuan tharum leh thinlung khauh tak a nei tih a la hriat tel loh vang a ni.

Chhungkaw harsa tak aṭanga seilian a ni a, 1998 World Cup-a France an champion khan khatih laia an rama naupang tam tak thinlungah football a tuh thar nasa, chung zingah chuan Pepe pawh a bang bik lo. Mahse, kum 5-9 thleng kha chuan academy-a luhna nei loin a school kal karlakah a remchanna hmunah a inkhel ve mai ṭhin.

Kum 2013 khan French tualchhung club pakhat Poitiers FC (Tuna 'Stade Poitevin FC' ni ta) tan trial a nei a, fifth division club tan hian a khel zui. A hnuah Angers zawm lehin anni hian Arles-Avignon lakah 26 August 2014 khan professional match hmasa ber khelhna hun an siamsak - a hnu lamah chuan a hawi kir tawh lo.

Feet ruka sang winger Pepe hi player tlan chak leh ball thiam a ni a, 4-4-2 formation hman a nih chuan striker atana hman theih a ni bawk - hun a hman tamna ber erawh mual sir dinglam a ni. Gunners-ah chuan Pierre-Emerick Aubameyang leh Alexandre Lacazette te nen tlarhma lamah an inkawp tura ngaih a ni.

Arsenal player manto ber nilai chu Aubameyang a ni, pound maktaduai 56 man hian 2018 January thla khan Borussia Dortmund aṭanga zawmin Alexandre Lacazette (£46.5m) chu a  rawn khum, hmatawngah Pepe (£72m) an neih belh a nih chuan an player manto pathum an tlar dawn tihna a ni ang.

Khawthlang media-te chuan tun nipui bazar nan hian Arsenal-in pound maktaduai 45 bawr chauh an neih thu an ziak uar viau a, tuna Pepe an lak dawn takah pawh striker Aubameyang chu sum tuak nan an hralh dawn nia sawi a awm leh hman tawh.

Mahse, Gunners boruak a fuh laklawh. BBC chuan Pepe lei nan hian Aubameyang leh Lacazette te hralh an ngaih loh tur thu an sawi bawk a, tun ṭuma an transfer vel buaipui tur hian Cristiano Ronaldo-a agent Jorge Mendes an inrawlhtir tih hialin an tarlang.

Arsenal manager Unai Emery chuan Auba chungchang an zawhna chhangin, "Premier League goal khung hnem ber ni lai hralh hi kan rilruah a awm ngai lo, kan ngaihtuah ngai lo takzet," a ti. Spanish manager hian player pathum emaw pali an lak tur thu a lo sawilawk tawh bawk a ni.

Arsenal hian an tlarhnung dawltu leh captain ni bawk Laurent Koscielny chu an chân ngei hmel a, mahse tuna a lan dan chuan tlarhnung laia awm tur aiin mual sira khel thei Kieran Tierney chu an ngaihven ber lai a ni.

Kum 22 mi defender lakluh tumin Gunners hian Celtic chu vawi hnih an dawr tawh, an dawrna hnuhnung zawk pound maktaduai 25 chu hnawlsak an ni. North London club an la beidawng lo, a vawi thum nan dawr leh ngei an tum.

Ivory Coast winger Wilfried Zaha pawh Arsenal hian pound maktaduai 40-in an dawr tawh a, Zaha hian Gunners tana a khelh chak thu sawi tawh mah se Crystal Palace lamin an player hi pound maktaduai 80 man a nih thu an sawi thung - Pepe a awm takah chuan Zaha hi an ngaihven zui a rinawm ta lo.

Player thar lakluh an neih lai hian English rawlthar winger Xavier Amaechi erawh Hamburg lamah an hralh thung. Kum 18 mi Amaechi hian German second division club tan season li daih contract a ziak. Amaechi hian Arsenal tan season khat daih contract a la nei a, an hnena cham turin contract duhawm zawk zawrh ni mah se inkhelh tam theihna tur hmun pan a duh ta zawk. A man hi pound maktaduai 2.5 niin, a khelh ṭhat dan a zirin a pung chho thei ang - club pahnih inrem danah Gunners hian an duh hunah an lei let thei ang tih a tel lo.