Turkish club lakah India U19 tlawm

November-a AFC Under 19 Championship Qualifiers an hmachhawn tur inbuatsaih nana Turkey-a tour nei India U19 chu Inrinni khan Kocaelispor U19 nen an match hnuhnung berah an inhmachhawn a, 1-0 in an tlawm. 

Blue Tigers rawlthar rual hian Oman U19 chu vawi hnih an hmachhawn bawk a, vawi khat chakin vawi khat erawh an tlawm thung. Jordan U19 nen pawh inkhel tura ruahman a ni a, mahse chhum zin nasat luatah inkhelh theih a ni lo a, an ṭhulh. 

Kocaelispor U19 lakah Mizo goalkeeper Lalbiakhlua Jongte leh Lalchhanhima Sailo te pawhin inkhel bul an ṭan a, Kocaelispor hian hun tawp dawnah goal khungin a vannei zawkah an ṭang ta a ni. India Under 19 hi nimin khan Turkey chhuahsanin an rawn kir. AFC U19 Championship Qualifiers-ah India hi Saudi Arabia, Uzbekistan leh Afghanistan te nen an awmho a, a awlsam dawn lo.