Indian football buaina: AIFF-in an buai tih an pawm!

All India Football Federation (AIFF) leh I League club inkar boruak a fel hleithei lo a, Indian FA secretary Kushal Das chuan Indian football-in harsatna a tawh mek thu a pha lo. 

Kushal Das chuan, "Rei tak chu kan up hram hram a, tunah chuan buaina lian tak kan tawk mek tih hi zep tur a awm lo. Kan thawhchhuah leh theih hram ka beisei," a ti! Kar hmasa khan I League club lungawi lo ten FIFA hnenah an lungawi lohna an thlen a, football khawvela thuneitu sang ber pawl hian AIFF hnenah lehkha thawn nghalin insawifiah turin an ti. 

Loh theih lohin AIFF an ṭawngchhuah a ngai a, Kushal Das meuhin Indian football a buai thu a sawi tak avangin I League leh Indian Super League hmabak sawi thiam a harsa hle.

Indian football buaina hi tun aṭang chauha inṭan a ni lo. Kum 2007 khan National Football League tia hriat ni ṭhin chu I League tiin a hming thlak a ni a, ruahmanna thar siam a ni - hei hi India rama football a lar zawk beiseina vang a ni. 

Kum 2010-ah IMG-Reliance an lo lang a, Indian football-a pawisa tlem vanglai takin vaibelchhe 700 an rawn theh chhuak. Kum 15 chhung atan AIFF nen thawhhona an ziak a, inremnaah IMG hi I League thuam ṭhat emaw league thar din phal sakna a tel. 

IMG lamin league thuam ṭhat chu thil harsa zawkah an ngai a, kum 2014 khan ISL an din. A tirah chuan ISL hi tournament ang chauhin kalpui a ni a, I League club-ten buaipui thamah an la ngai lo. Mahse, IMG leh AIFF inremna a lang chhuak tial tial a, ISL chu India rama league sang ber ni turin tih a ni ta - I League club neituten an mawng an hung hle hle thei lo a, AIFF thutlukna hriatthiam har an ti. 

I League din a nih tirh aṭang khan club 30-in he inelna hi an lo khel tawh a, chung zinga club 20 chuan club an tihtawp loh pawhin state league chiah khel turin an inhnukdawk. 

Tunah club 10 zet dinhmun a chiang lo zui - I League lo khel tawh club tam zawkin tihtawp an thlan chhan hi top league atana ISL hman a nih tur thu an hriat ruk vang a ni a, ṭhenkhat erawh AFC club licensing criteria an zawm theih loh vang a ni. 

I League club-te an thiam bik lo. Kha leh chen Indian football-a hun an hman chhungin club tam zawkin professional taka inenkawl an tlin lo a, players hlawh ba an awm ṭhin bawk. Heng zawng zawng thlirin IMG-in I League thuam ṭhat aia an thuhnuaia awm tawp tur ISL duan an lo thlang kha an thiamawm a, mahse buaina a awm tak miau avangin chinfelna zawn a ngai. 

FIFA-in AIFF lehkha an thawnah kum 2018-a Indian football kalphung tur AFC nen an lo duan tawh chu eng angin nge kalpui a nih, tih zawhna a awm. 

Indian football kalphung tur FIFA leh AFC-in an duan sak zingah hian 2019-20 aṭanga ISL chu I League club pahnih belh chunga league sang ber nih tir te, League Transition Commission (LTC) din tihte a tel. Mahse, he rawtna zawng zawng hi AIFF chuan a kalpui lo. FIFA rawtna ang chuan LTC-ah hian FIFA leh AFC aṭangin member an tel tur a ni tih a ni a, mahse LTC pawh hi din a la ni chuang lo. 

Kushal chuan, "Keini aia Indian football hrechiang an awm chuang lo a, FIFA leh AFC mi ruat kher a ṭulna a awm lo. LTC hi din tura beisei chu kan ni ngei a, mahse kan tana ṭha ber tur ngaihtuah phawt a ṭul a ni," a ti. 

Rawtna langsar ber tih ngam chu season thar aṭanga top division-a ISL dah a ni - mahse I League club pahnih dah tel an ni ang a, club 12-in top division-ah bul an ṭan ang. 

Season hnih dang chu relegation a awm rih lo ang a, I League club pahnihin an belh zel ang - 2021-21 season-ah chuan club 16-in top league an khel ang a, season tawpah relegation leh promotion a awm nghal ang. FIFA ruahmanna hi thlir chuan thil ṭha tak a ni a, mahse AIFF bawkin an kalpui thei tlat lo. Kushal Das chuan, "Tuna kan buaina bulpui ber chu participation fee (Vaibelchhe 15) hi a ni a, I League club-ten hei hi an pek ve a ngai a ni," a ti. 

Tun dinhmuna I League club zinga ISL khel tura beisei ber chu East Bengal leh Mohun Bagan an ni a, mahse Kolkata club hlun pahnih hian ISL khel tura fee tam uchuak tak pek an tum loh thu an lo sawi tawh. 

AIFF-in sum a ngah lo a, sum petu chu IMG-Reliance an ni. Kushal Das chuan, "Relegation system awm chunga league siam chu kan duh ngei a, mahse sum leh inenkawlna lamah buaina  a awm tlat a ni. Indian football chhanhim tur hian sum kan mamawh tih hi rocket science anga thil hriatthiam harsa a ni lo," a ti. 

Kushal chuan sawi zawmin, "Thawk leh khatah kan buaina hi chinfel vek theih a ni lo. AFC leh FIFA pawh min rawn tlawh turin kan sawm a ni. A nihna dik takah chuan buaina irh chhuak ta hi ṭha ka ti a, chinfel vat a ngai," a ti zui. 

Indian FA hotupa ṭawngkam aṭangin Reliance ni lo, suma pui thei tur dang AIFF-in an mamawh niin a lang a, chutiang an awm hma chu huaisen taka thutlukna siam AIFF hian a harsat dawn. 

Mohun Bagan hotupa Debashis Dutta chuan, "AIFF hian FIFA rawtna an pawm thei lo a nih chuan an ngawi rei mah mah a, kum khat chhung khan enge an lo tih? FIFA hnenah tal an hriattir tur alawm," tiin AIFF chet muan thu a sawi. 

1.    2018/19 season zawh rualin ISL leh I League top team ten Indian Championship title an inchuh ang a, 2020 AFC Club Competition hmun an inchuh ang. 

2.    2019/20 season aṭangin top league pakhat neih tur a ni. Club 10 chu ISL club awmsa an ni ang a, a dang pahnih chu

    a)    I League champion leh hmun ruak lilama chhang huai ber emaw 

    b)    I League-a champion leh runners up an ni ang. 

3.     2019/20 season aṭangin AFC Club Competition-a inlan tur chu top league aṭang chauhin a ni ang. 

4.     2020/21 season-ah club pahnihin an belh leh ang a, 2021/22-ah club pahnih thoin an belh leh ang. 2021/22 season tawp rual hian promotion leh relegation (2 up/2 down) a awm zui ang. 

5.     2019/20 aṭangin second division-ah team 12 an awm ang a, top league zulzuiin team 16-a kai sang turin kalpui a ni ang. 

6.     League sang pahnih hi home & away league system-a kalpui tur a ni a, Sept/Oct-ah season ṭanin Apr/May-ah season an khar ve ve ang. 

7.     Third division mumal taka kalpui theih hma chu state league ho ngaih pawimawh a, chumi kaltlanga ruahmanna siam tur a ni.