Tour de France pakhatna Egan Bernal

Pathianni khan Egan Bernal chu khawvela cycle intlansiak ropui bera ngaih Tour de France-ah pakhatna a ni a, Colombian zinga pakhatna ni thei hmasa ber a ni a. Kum 22 mi Bernal hi kum 110 chhunga pakhatna ni thei naupang ber a ni bawk.

Kum 116-a upa inelna Tour de France hi July 6 khan Brussels, Belgium aṭanga tlan ṭan a ni a, stage 21 awmin stage tawpna ber hi July 28 khan Rambouillet aṭangin Paris (Champs-Elysees) thleng tlan a ni. Inelna ṭantirha ruahman dan chuan 3,480 km a thui tlan tur a ni a, amaherawhchu khua a chhiat avangin stage 19-na leh 20-na chu pawh tawi a ni a, a vaia an tlan zat chu 3,365.8 km a la ni pha tho.

Egan Bernal zawh hian nikuma pakhatna Geraint Thomas a thleng. Stage hrang hrang zingah a tawp kharna stage 21 an ngai hlu a, Australian rider Caleb Ewan chu Paris-ah a thleng hmasa ber. 

Tour de France-ah hian lawmman hi chi hrang hrang a sem darh a ni a, point hmu tam ber lawmman (green jersey) chu world champion a zawna vawi thum ni thei Slovak rider Peter Sagan-a'n a dawng a, he lawmman hi vawi sarih - 2012, 2013, 2014, 2015, 2016, 2018 & 2019 a dawnna niin German Erik Zabel-a record chu khumin record thar a siam.

King of the mountains an tih mai polka dot jersey chu Italian rider kum 28 mi Romain Bardet-a'n a chang a, a vawi khat nihna a ni a. A pumpuia pakhatna Egan Bernal hian kum 26 hnuai lam tana siam chawimawina white jersey a dawng tel a, Colombian rider hian hmabak a nei êng hle.

Tour de France pakhatna Egan Bernal chuan, "Ka pa hi a naupan laiin cyclist a ni a, professional erawh a ni lo. Amah vangin he infiamnaah hian ka lut a, kum riat ka nihin kartawpah min chhuahpui ṭhin. Kan khuaah inelna buatsaih a ni a, ka pain tel phal lo mah se ka ṭhiante ka hming pein helmet min pe bawk," tiin a bul ṭan dan a sawi.

Colombia khaw pakhat Zipaquira-ah January13, 1997 khan a piang a, Androni Giocattoli–Sidermec team tan tlan ṭanin kum 20 mi lek nichungin Tour de l'Avenir-ah a pumpuiah pakhatna a ni a. Team Sky (Team Ineos) chuan Bernal-a theihna hmuin kum 2018 khan an lalut nghal chat.

2018 Tour de France  pakhatna Geraint Thomas chuan, "Kum hnih liam ta khan ka kutah hliam ka tuar a, Chris Froome-a'n pakhatna dinhmun a luah kha pawm thiam har ka ti hle. Tun ṭumah erawh tun hma angin beisei a sang lo a, pakhatna hi ka teammate a ni a, ka pawm thlap," tiin a sawi.

Welsh rider kum 33 mi Geraint Thomas chuan sawi chhunzawmin, "Egan hian hmabak êng tak a nei a. Kum 45 mi ka nih chuan ka thau tawh ang a, pub aṭangin a vawi 10 nana Tour de France pakhatna a nih lai ka en ang. Chumi hunah chuan ka thil hriat zawng zawng ka hrilh tih chhuang takin ka sawi ang," tiin a tluk loh Egan Bernal a fak.

Bernal chuan, "Khawvela pa hlim ber ka ni. Tour de France-ah pakhatna ka ni a, ka awih thei lo. Ka teammate zawng zawng chungah lawmthu ka sawi a, a bik takin hun ṭha min siamtu G (Geraint Thomas) hnenah ka lawm hle," tiin a lawm thu a sawi.