India cricket team tan sponsor thar

Chinese mobile company Oppo chu India cricket team sponsor aṭangin an inhnukdawk dawn a, Bangalore lama hmunpui nei Byju chuan September 15 aṭangin India hi an sponsor ang. 

India hian August 3 - September 2 thleng chu West Indies-ah tour an nei dawn a, Oppo hming chuanna jersey an la ha ang. Mahse, September 15-a South Africa-a tour an neih aṭang chuan Byju hming chuanna jersey an ha tawh dawn a ni. 

March 2017 khan Oppo hian India sponsor turin an chhang huai ber a, kum nga chhung atan vaibelchhe 1079-in an chhang. Vaibelchhe 768-a chhangtu Vivo mobiles khumin sponsor hi an chang. Mahse, Oppo-in India an sponsor-na an thlirlet a, tam an tih thar avangin an inhnukdawk. Educational technology & online tutorial firm Byju an lo lang a, Oppo leh BCCI lo inrem sa tawh angin March 2022 thleng chu India an sponsor ang. 

India cricket team-in bilateral match (ram pakhat nena series an neiha match khat) zelah Oppo aṭangin vaibelchhe 4.61 an dawng a, ICC huaihawt inelna match-ah vaibelchhe 1.56 an dawng bawk. Oppo insen ang zat tho hi Byju hian an seng ang. Oppo hmaa STAR India nena an thawh dunnaah chuan BCCI hian bilateral match-ah vaibelchhe 1.56 an dawng ṭhin a, ICC match-ah nuai 61 an dawng ṭhin.