German-ah Verstappen chungnung ber

Ruah sur leh buaina hrang hrangin a tih buai karah German Grand Prix chu Pathianni zan khan tlan a ni a, driver 13 tlan thleng zingah Red Bull duhlai Max Verstappen a thleng hmasa ber. German tlangval Sebastian Vettel chu a hnung ber aṭangin tlan mah se pahnihna dinhmun a luah phak! Season hmang ṭha tluang tak Mercedes erawhin beisei an phak lo, championship hmahruaitu Lewis Hamilton chu pakuana niin, a teammate Valtteri Bottas chu a tlan tluan ve thei lo.

Hockenheimring tlankawng chu ruahsur vangin a huh hle a, boruak a hnawn em bawk avangin nidang aiin chetsual a awl dawn tih chu thil chiang sa a ni. Pahnihna aṭanga bul ṭantu Verstappen pawhin harsatna neuh neuh chu a tawk, intlansiak hmasa chanve vel chu pathumna dinhmun a luah.

Red Bull driver hian tawn­hriat la ngah tawk lo mah se boruak sang tak karah a buai duh lo, a hma a awm Charles Leclerc, Nico Hulkenberg leh Hamilton te tlan pelin tun season chhung bika a vawi hnih nan hnehna a chang.

Dutch tlangval Verstappen chuan, "Intlansiak hautak leh hriatreng tawh tur chu a ni, team lam aṭangin fimkhur tur leh thutlukna dik siam ngam tura fuihna ka dawng a, an duh leh ka tum angin ka hlen thei. 

"Kawng kawi ka hmang ṭangkai ṭhin a, tihsual nei tlem tan hnehna channa kawng a inhawng zau tih ka hriat avangin fimkhur takin ka tlan. Hnehna chan hi a hluin a ropui bik hle a ni," tiin a sawi.

Inelna neih hmain Sebastian Vettel chuan 'intercooler prob­lem' a nei a, a hnung ber aṭangin intlansiak bul ṭan mah se lap khatna an tlan chhung lekin pasarihna dinhmun a luah hman. Lap thumna an tlan laiin Sergio Perez a chetsual avangin Safety Car an rawn luh a ngai a, a hnu lamah pawh vawi nga ngawt an luh a ngaih phah.

Season hmasa ang bawkin Vettel hian an ramah point a hmu lo ang tih hlauhthawnna a awm hman, mahse tihsual lian tham em em nei loin a tlan tluang a, a tawpah pahnihna niin a teammate Charles Leclerc erawh podium lawn ngei tura a lan hnuah hnung tawlhin a tlan tluan ve thei ta lo.

World champion vawi li ni tawh Vettel chuan, "Lap ṭhenkhat kan tlan lai kha chuan a tawp thei dawn lo emaw tih mai turin a thui ka ti hial, boruak awm dan avangin inelna a hautak em em, a tawpah erawh result hlimawm tak a ni," tiin a sawi.

Season kal laiah Mercedes an chungnung hle a, champion lai Hamilton leh Valtteri Bottas ten hnehna an inchan chhawk deuh reng - an inkarah vawi khat Max a rawn tlazep tih loh chu ram tinah ro an rel zel.

Mahse, Germany-ah erawh boruak a danglam, a hmasa ber (pole) aṭanga bul ṭantu Hamilton-a'n damlo chungin inelna a hmachhawn. Britain tlangval hian tihsual a ngah a, chetsualna lian tham tawng lo mah se kawng sir deuha tlan leh kawng kawi hman fuh tawk loh a ngah. Bottas phei chu lap ruk tlan hmabak an la neihah chesualin a inlan zui thei lo.

F1 team ṭha Mercedes-in inelna an hmachhawn hnuhnung pakuaah vawi riat ngawt hnehna an chang thei a, amaherawhchu Germany-a an chet dan avang hian season chawhnu lamah eng tiangin nge an kal dawn tih chu car intlansiak ngainatute hriat chak a ni.

Tun season chhungin For­mula 1 inelna hi vawi 21 a awm dawn a, chung zinga 11 chu an tlan tawh. August 4 hian Hungarian Grand Prix chu Hungaroring, Mogyorod-ah an tlan leh ang.