German player ṭha ber Reus

Borussia Dortmund captain Marco Reus chu kum 2019 chhunga German player ṭha ber atana thlan a ni a, he chawimawina dawng tur hian vote tla 540 zinga 158 a hmu a ni.

Chawimawina hi German Sports Journalists rualin an thlan a ni a, kum 30 mi Reus hnungah hian Bayer Leverkusen star Kai Havertz (121 votes) leh Bayern Munich defender Joshua Kimmich (35) te an awm bawk.

Season hmasa khan Reus hian Bundesliga match 27 a khelh aṭangin goal 17 a khung bakah assist vawi riat a nei bawk. A team hi pahnihna nihpuiin, nomawi chawi thei dinhmuna an din tawh hnuah an tawlh thluk avangin Bayern Munich hnuaiah an awm.

Reus chuan, "Ka tan chuan award hlu tak a ni, ka thil tih tlem tham tak min hriatsak tute chungah lawmthu ka sawi. Hliam na tak ka neih hnuah harsatna hrang hrang ka tawk a, sang taka ka rawn tho chhuak thei hi a lawmawm takzet," a ti.

Nikum khan Real Madrid midfielder Toni Kroos chuan he chawi­mawina hi a dawng a, Reus-a'n a dawng ve leh ta - Dortmund forward hian 2012 khan he chawimawina hi a lo dawng tawh bawk a, hetihlai hian Borussia Mönchengladbach tan a khel thung.  

Dortmund player zingah he chawimawina hi Hans Tilkowski (1965), Matthias Sammer (1995 & 1996) leh Jurgen Kohler (1997) te chuan an lo dawng tawh bawk.