MFA Super Cup-ah MPL club an hriat hran

Lalbiakliana Memorial MFA Super Cup 2019 quarterfinal-ah Mizoram Premier League club la dam pathum Chanmari FC, Electric Veng FC leh Mizoram Police ten an khingpui Mission Veng FC, J&C FC Hmunṭha leh Youngstar FC te an sawp vek.

Nimin Lammual inkhel hnuhnung berah Bethlehem Vengthlang-in penalty shootout hmangin Dinthar FC an hneh a, kumin MFA Super Cup semifinal-ah club langsar vek an luh avangin inkhel entute tan duhthsam a ni. Semifinal-ah hian Chanmari FC-in an coach hlui Lalsangzuala Hmar enkawl Electric Veng FC an hmachhawn dawn a, Mizoram Police leh Super Cup champion tawh BVT te an inkhel ang. Final luh inchuhna hi Nilainiah khelh tur a ni.

Chanmari FC-in quarterfinal lut turin Lily Veng 16-0 in an hneh a, kawng engkimah an chungnung. Nimin inkhelah pawh Chanmari FC-in harsatna an la tawk lo a, Mission Veng lamah a khat mawi tawkin goal an khung.

Chanmari tan hian Lalremruata leh Zakaria Lalhriatpuia ten goal hnih ve ve an khung a, Lalrinchhana, Lalremruata (Bata) leh Lalrammuanpuia ten goal khat ṭheuh an khung. Coach S. Malsawmtluanga hote hian harsatna nei loin semifinal an lut a, chutihrualin Mission Veng laka inkhel an thunun chunga goal an chhuah avangin an lawm a kim lo ang.

Electric Veng FC-in an match hmasa berah Darlung GSA chu penalty shootout hmangin an hneh hram a, niminah erawh J&C FC Hmunṭha lakah 11-1 zetin an chak.

Coach Sanga hote tan Ram­hlunchhunga, Vanlalremkima (Tetea) leh David Lalchhuanawma ten goal hnih ṭheuh khungin Lalrammawia, C. Lalnunmawia, Vanlallawmtluanga, Vanlalremruata leh Lalengmawia ten goal khat ṭheuh an khung.

Season liam ta khan MPL kai thar Electric Vengin MFA Super Cup an khel lo a, tun ṭumah erawh Sanga hoin Chanmari FC lakah a hawi hniam bik lo ang.

Mizoram Police-in tun inelna bika match khata goal khung tam ber record an siam a, Kolasib club Youngstar FC lakah goal 18 zet an khung.

Police tan hian Lalbiakhlua'n (Biaktea) goal ruk zet khungin Lalfakzuala (5), R. Malsawmtluanga (2), Laldawngliana Colney (2), Lalramtharmawia, Lalnunsanga Hnamte leh Laldinpuia ten goal an khung bawk. Lalbiaksanga Colney hoten semifinal-ah team nem bera ngaih BVT an hmachhawn dawn a, final kawng a inhawng zau hle.

Inkhel hnuhnung berah Dinthar FC-in inkhelh ṭantirh lam thunun mah se Bethlehem Vengthlang lamah minute 47-naah C. Lallawmsanga hmangin goal an khung thei chauh a. BVT-in goal an chhuah hnuah insiamṭhain minute 58-naah C. Ramnunpuia hmangin siphurh an sut a, team pahnih an inhnehtawk chhunzawm avangin 1-1 in inkhel a tawp.

Penalty shootout hmangin chak zawk zawn a ni a, BVT tana pen chhuak mi paliten an pet goal vek bakah an keeper Malsawmkima'n ṭum hnih a dan avangin 4-1 in hnehna an chang.

July 29, Thawhṭanni

Chanmari FC    7 - 1    Mission Veng FC

CFC : Lalrinchhana 20'; Lalremruata 24', 73'; 

Zakaria Lalhriatpuia 48', 78'; Lalremruata 54'; 

Lalrammuanpuia 76'

MSV : Daniel Lalhriatpuia 63'

J&C FC Hmunṭha    1 - 11    Electric Veng FC

J&C : Lalbiaknunga 38' (P)

EFC : Ramhlunchhunga 15', 45'; Lalrammawia 20'; C. Lalnunmawia 24' (P); Vanlallawmtluanga 44'; Vanlalremruata 53'; Vanlalremkima 56', 78';  Lalengmawia 76';  David Lalchhuanawma 82', 88'

Mizoram Police    18 - 0    Youngstar FC, 

        Kolasib

MPFC : Lalfakzuala 4', 27', 48', 76', 86'; 

Lalbiakhlua (Biaktea) 19', 32', 36', 55', 65', 88'; R. Malsawmtluanga 30', 44'; Lalramtharmawia 38';  Lalnunsanga Hnamte 67'; Laldawngliana Colney 73', 75'; Laldinpuia 83'

Dinthar FC    1 - 1    Bethlehem VT

Penalty Shootout-ah BVT 4-1 in an chak

DFC : C. Lallawmsanga 47'

BVT : C. Ramnunpuia 58'

Semifinal 

July 31, Nilaini

Mizoram Police    02:00 PM    Bethlehem Vengthlang

Chanmari FC    07:30 PM    Electric Veng FC