Kolasinac leh Ozil ten hun la mamawh - Emery

Arsenal manager Unai Emery chuan tun hnaia an player pahnih beih tawk Kolasinac leh Mesut Ozil te chuan hliam nei lo mah se inkhel tura an la inpeih loh thu a sawi chhuak.

Kar hmasa Ningani khan Gunners midfielder leh defender te hi London khawlaiah misual hriamhrei kengin an bei a, Bosnian tlangval Kolasinac hian huaisen takin a beilet. Beih an tawh aṭanga pre season match an neih leh hmasa berah player pahnih hi an inlan ve rih lo.

Pathianni zan khan Gunners hian season thar inbuatsaihna pakhat Emirates Cup-ah Lyon an mikhual a, striker Pierre-Emerick Aubameyang hmangin goal hmahruai an khung chu Moussa Dembele-a'n goal hnih hmanga a chhenlet avangin an mualah an tlawm.

Gunners manager Emery chuan, "Ozil leh Kolasinac ten hliam an nei lo, amaherawhchu an rilru hi inkhel turin 100% in a inpeih lo tih kan hria. Hun an la mamawh deuh a, ṭha takin training chu an nei chhunzawm tho ang a, hun rei lote chhungin an inpeih tawh ang," tiin Lyon laka a chhawr ve loh chhan a sawi.

Premier League club hian tun nipui bazar chhungin player thar lakluh belh leh ngei an tum a, tunah chuan an club player manto ber ni turin Nicolas Pepe chu an dawr mek - tunkar chhunga tihfel hman an inbeisei. Spanish manager Emery chuan, "Pepe hi player ṭha tak a ni, kan hnena a rawn kal a nih chuan kan squad ti chak thei tur zinga mi a ni. A chungchangah hmalak mek a ni a, kan thil tum ber chu season thar kan hman ṭan hma ngeia team ṭha tak din a ni.

"Defender, midfielder leh winger pakhat ṭheuh kan mamawh a, amaherawhchu player nazawng dawr ngawt kan duh lo. Team tana ṭha tur leh kan ṭangkai pui ngei tur chauh kan lalut ang, player kan neihsa thuam chakna tur hi kan mamawh chu a ni," tiin a sawi.

Nilaini zanah Gunners hian Angers chu friendly match an khelhpui leh dawn a, season thar inbuat-saihna match hnuhnung ber atan August 4 zan hian Nou Camp-ah Spanish champion Barcelona nen an inkhel leh bawk ang.

Unai Emery naute hian Premier League season thara an match hmasa ber atan August 8 zan hian Newcastle an lenchilh dawn a ni.