Lukaku leh Darmian te an tel lo

Nimin khan Manchester United manager Ole Gunnar Solskjaer chuan Norway-a zin tur player 26 awmna squad a puang a, chhuak tura sawi Romelu Lukaku leh Matteo Darmian te telh an ni lo.

United hian zanin dar 10:30 hian Oslo-ah Norwegian club Kristian-sund an hmachhawn dawn a, Premier League-a Chelsea nen an inkhelh hmain August 3 zan hian AC Milan nen friendly match an khel leh ang. 

Solskjaer-a hote hian pre season friendly match li Perth Glory (2-0), Leeds United (4-0), Inter Milan (1-0) leh Tottenham Hotspur (2-1) te khel tawhin an la chak vek a, goal kua an khung tawhah United Academy aṭanga inzirchhuak player-te an inrawlh vek.

Romelu Lukaku hian Norwegian manager Solskjaer hnuaiah hmun pawimawh a chan a rinawm loh avangin starting XI a khelh theihna turah chhuah a duh a, Inter Milan manager Antonio Conte chuan an mamawh tak leh a player duh zawng a nih thu a zep lo bawk.

Belgian striker hi Australia leh Asia-a tour an neih ṭumin zin ve ve mah se a la inlan lo a, tun ṭuma squad-a an telh loh leh takah chuan chhuak ngei tura ngaih a ni. Lukaku agent Federico Pastorello chuan, "Kan chhunzawm thuai dawn," tiin ngaih belh theih tur social media lamah a ziak a, Pastorello hi Inter Milan manager Antonio Conte agent tho a ni.

Tottenham Hotspur nen an inkhelh ṭuma zawn chhuah Eric Bailly pawh a la inlan thei dawn lo a, Ivorian defender hi a khup hliam avangin kar ruk aṭanga kar riat a chawlh a ṭul dawn. Bailly hi season liam ta khan Chelsea nen an inkhelh ṭuma a inliam avangin kumin Africa Cup of Nations-ah pawh a inlan thei lo.

United hian an chak lohna tlarhnung thuam chak tumin central defender an melh chhunzawm zel a, Leicester City defender Harry Maguire hming a la ri ring ber. Solskjaer-a hote hian nipui transfer-ah Aaron Wan-Bissaka leh Daniel James te chauh an la lakluh avangin player pahnih khat la belh tura ngaih an la ni a, an sawi zawm zingah Lazio midfielder Sergej Milinkovic-Savic, Bruno Fernandes leh Blaise Matuidi te pawh an tel a ni.