Murray-a'n singles match a beisei

Grand Slam vawi thum champion tawh Andy Murray chuan tun hma anga inkhelh leh theih a beisei a, tun aṭanga hun rei vak lo hnuah singles match khelh leh tumin hma a la mek.

Kum 32 mi Murray hi kumin January thla a khelh Australian Open hnuah singles huangah a la inlan leh lo, a khel bawr hliam vanga harsatna a neih hnuah Wimbledon khan doubles a khel thei hram - mahse a tum leh beisei ang erawh chuan a la khel thei rih lo.

World number 1 hlui Murray chuan, "Ka chet vel a nuam tial tial a, hun rei vak lo hnuah match pangngai ka khelh theih ka ring. Singles hi khelh leh ka chak takzet a, a theih veleh ka inlan ang. Chutihrualin doubles pawh ka tana ṭha zawk tur a nih chuan ka khel zel ang.

"Inelna ka hmachhawn hmasak atan chuan best of five khelh ngai ni nghal lo se, match rei lo deuh zawk aṭanga bul ṭan theih chu ni se duhthusam a ni," a ti. August thlatir lama khelh tur Cincinnati Open chu khelh a chak thu a sawi tel bawk.

Tun thla tir khan Murray hian US Open khelh chu atan beisei ngam chi a nih loh thu a lo sawi tawh a, tun hnaia a hmasawn dan thlir erawh chuan Britain tlangval hi hard court inelna lianah kan hmu thut a nih pawhin a mak lo ang.