Evra a chawl, coach nih a tum

Manchester United leh France defender hlui Patrice Evra chuan July 29, Thawhṭanni khan football khelh a chawlhsan thu a puang. Kum 38 mi Evra hian thla 18 chhungin coach ni tura ṭul ang zawh a, team enkawl a tum thu Italian chanchinbu La Gazzetta dello Sport a hrilh.

Evra hi May 15, 1981 khan Dakar, Senegal-ah a piang a, unau 24 zet an ni. A pa hi Senegalese embassy-ah diplomat a ni a, nupui pathum neiin vawi hnih a ṭhen.

A naupan laiin Evra hi kawngpuiah a inkhel ṭhin a, a thiamna hmutu Tshymen Buhanga chuan khawtual club CO Les Ulis coach bulah hruaiin "Romario thar ka rawn hruai e," tiin a dah sang hle. Evra hi striker position-ah a khel ṭhin a, Ligue 1 club Rennes leh Lens-ah trial neiin a tet vangin an hnawl a, club langsar dang Toulouse leh Paris Saint-Germain-ah te pawh trial a nei. PSG training-na hmun Camp des Loges-ah pawh inzir ve hman mah se club hotute a hmin zo lo a, thla rei lote hnuah an chhuah.

Striker aṭangin winger-ah a insawn a, PSG-in an hnawl hnu hian Italian scout-in an hmu fuh. Torino-ah trial neiin youth team-a awm turin an sawm a, hetihlai vek hian Serie C1 club Marsala aṭangin sawmna a hmu bawk. Kum 17 mi Evra chuan Marsala a thlang a, professional contract a ziak. Season khat ṭha taka a khelh hnuah Serie B club Monza zawm lehin khelhna hmun pek tam a ni lo. Hemi hnu hian France-ah kirin Ligue 2 club Nice a zawm a, reserve team tan a inlan tam. 2001–02 season-ah Evra hian hmun pawimawh chang chhoin Nice chu Ligue 1-ah a kaipui a, team of the year-ah left back anga telh a ni.

Monaco-in an lalut a, Evra hian left winger-ah khelh duh mah se manager Didier Deschamps-a'n left back-ah a chhawr tur thu a tichiang. Khawvelin Monaco aṭangin Evra theihna an hria a, 2004 khan UNFP Young Player of the Year award dawngin Ligue 1 Team of the Year-a thlan zingah a tel bawk.

Sawmtu tam tak karah Evra hian January 2006 khan Manchester United a zawm a, Premier League kal hmang hre turin hun erawh a duh. French defender hi United tan a inlan hmasak berah Manchester City lakah 3-1 in an tlawm a, first half chauh khelhtir a ni.

Evra hian a theihna tak a phochhuah hnuah erawh Sir Alex Ferguson-a tlarhnung tikhawngtu ni ringawt loin khelmual chhunga hruaitu pakhat a ni a. Manchester United hi Premier League (5), Champions League (1), League Cup (3) leh FIFA Club World Cup (1)-ah champion-pui vekin defender hlawhtling ber zinga mi a ni.

French defender hian Juventus zawm lehin Serie A leh Coppa Italia nomawi pahnih ve ve a chawi a, hemi hnu lamah erawh a career zuih chhoin Marseille leh West Ham United-ah erawh sawi zui tlak a hnutchhiah lo.

Evra hian ṭawng chi hrang hrang English, Italian, Spanish, Portuguese leh French te a thiam a, United tana a khelhpui Park Si-Jung nen inbiak pawh awlsam zawk nan Korean tlem a zir bawk. Kum 2017 khan Park-a nu a thi a, Evra hi a ṭhianpa Park-a hnem turin South Korea a kal hial. An inkawmngeih avangin Park-a pa hi 'papa' ti hialin a ko ve bawk.

Evra chanchina bet tel tlat chu Luis Suarez a ni. October 2011 khan Liverpool leh United inkhelh ṭumin Suarez hian vun rawng hmuhsitna ṭawngkam a chhak chhuak a, Uruguayan forward hi match riat hrem a nih bakah £40,000 chawitir a ni.

Thla li hnuah club pahnih an intawng leh a, Suarez hian Evra hi chibai duh loin French defender hian a kutah a man sak kher. United hian an hmelma Liverpool hi 2-1 in an hneh a, Evra hian Suarez bulah uar takin an chak a lawm.

Suarez hi Chelsea defender Branislav Ivanovic a seh avangin a mualpho a, Evra hian tih el nan 2013 Premier League an champion an lawm pahin kut lem a seh. Uruguayan forward-in Premier League nomawi pakhat pawh chawi loin Barcelona a pan a, vun rawng vanga a hmuhsit Evra erawhin Premier League nomawi panga a chawi.

Evra hian a career tawpna West Ham-ah a hmang a, professional match a khelh hnuhnun ber chu May 2018 daih tawh kha a ni. Amaherawhchu official-in Thawhṭanni khan inkhelh a chawlhsan thu a puang chauh.

Evra chuan, "Tunah chuan ka football khelh hun chu a tawp ta. Kum 2013 aṭang khan UEFA B Coaching Licence ka ṭan tawh a, tunah chuan hemi hi zawha UEFA A Licence chhunzawm vat ka duh. Thil a kaltluan chuan kum khat leh a chanve hnuah chuan team enkawl turin ka inpeih ang," tiin coach ni tura bul ṭan a tum thu a sawi.