400m hurdles world record siamtu Muhammad

Olympic champion Dalilah Muhammad chuan 400m hurdles huangah world record thar a siam ta, Thawhṭanni khan kum 16 chhung zet record lo awm tawh chu a rawn thaichhia.

US National Championships neihah kum 29 mi Muhammad hian 400m hurdles chu 52.20 seconds chhungin a thleng a, tun hma lama Russian infiammi Yuliya Pechonkina record lo siam tawh 52.34 chu a rawn khum chiang hle.

Muhammad chuan, "Ka result hian min barakhaih hle, hetiang chhung hian ka tlan chhinna hunah pawh ka thleng ngai meuh lo. Coach pawhin record ka siam theih hi chu ring mah se a beisei phak bik lo," tiin a beisei phak baka ṭhain a tlan thu a sawi.

Kum 19 mi chauh Sydney McLaughlin chuan second 52.88 chhunga thlengin pahnihna a ni a, a hnungah hian Ashley Spencer (53.11 second) a thleng ve thung. Pakhatna aṭanga pathumna te hi September thlaa Doha a neih tur World Championships atan an tling nghal.

Mipa inelna 200m lamah Noah Lyles chuan second 19.78 chhunga thlengin pakhatna a ni a, 100m champion Christian Coleman chuan second 20.02 chhunga thlengin pahnihna a ni bawk - anni pahnih pawh hi World Championships atan an tling.