MSBA buatsaih League Cup an khel ṭan

Mizoram Snooker & Billiards Association buatsaih The League Cup 2019-20 thawh khatna chu July 25-26 khan MSBA Hall, Hawla Indoor Stadium, Republic Vengthlangah ṭan a ni.

The League Cup-ah hian MSBA hruaitu thi tawhte hming chawiin team pali Team L Pachuau (Upper Republic), Team Dawngtea (Khatla), Team Robert (Zarkawt) leh Team Charles (Tuikual) te an awm. June thla khan team tinte player tur thlanna Players Draft neih a ni tawh.

Thawh khatnaah hian 9 Ball intihsiakna hmangin inelna neih a ni a, Mizoram State Sports Council Calendar angin season khat chhungah intihsiakna khung a ni ang. Inelna hi  8 Ball, 10 Ball, 6 Red Snooker leh 15 Red Snooker hmangin neih chhoh a ni ang.

Thawh khatna 9 Ball hmanga inelnaah hian team pali an inhnehtawk hle. Team Robert leh Team Dawngtea te vawi hnih ve ve chakin point ruk an hmu ve ve a, Team L Pachuau leh Team Charles te vawi khat ve ve an chak bawk.

League Cup-ah hian Mizoram chhunga Cue Sport player ṭha an kim hle.  Inelna hi August thla chawhnu lamah neih chhunzawm leh tur a ni a, hemi hma hian Mizoram Snooker & Billiards Association chuan Mizoram State Snooker Championship a buatsaih leh phawt dawn a ni.

MSBA hnuaia inelna hrang hrangte hi Mizoram State Sports Council sponsor an ni bawk.