Vawiinah MFA Super Cup semifinal Zanin dar 7:30-ah Chanmari Vs Electric Veng

Lalbiakliana Memorial MFA Super Cup semifinal chu vawiin hian Lammualah khelh a ni dawn. Tlai dar 2:00-ah Mizoram Police leh Bethlehem Vengthlang te an inkhel dawn a, hmuhnawm tura beisei Chanmari FC leh Electric Veng FC chu zanin dar 7:30 atan sawn a ni.

MFA Super Cup hi vawi ruk khelh a ni tawh a, semifinal khel tur zingah Chanmari FC (2) leh Bethlehem Vengthlang (1) ten nomawi an chawi tawh. Mizoram Police leh Electric Veng FC ten final an la lut lo.

Semifinal-ah MPL club an hriat hran a; Mizoram Police, Chanmari leh Electric Veng te awlsam takin an chak vek. MPL aṭanga tla hlim Bethlehem Vengthlang erawhin First division-a an awmpui Dinthar FC chu penalty shootout hmangin an hneh hram.

Vawiin tlai inkhelah pawh hian Mizoram Police hi an chak ang ngem tih zawhna aiin engzatin nge an chak ang tih chu zawhna kalhmang tur niin a lang. Police hian season liam ta khan recruitment a nei a, tualchhung player 

ṭha an rut khawm.

Amaherawhchu, season liam ta khan Police tharte hian training an neih avangin coach Lalbiaksanga Colney a chhawr mumal thei lo a, awmze neiin training an nei thei lo bawk. Tun season aṭang hian Police hian an theihna an lantir ṭan dawn a, Kolasib club Youngstar FC laka goal 18 an khung aṭang hian an ṭhat dan tur a teh theih.

BVT-in final thlen an duh a nih chuan 'bus' an park a ṭul dawn a, hetichung pawh hian vanneihna namen lo an la mamawh tel bawk ang. BVT hian Police aiin Super Cup-ah sulhnu nei ṭha zawk mah se tun ṭumah erawh an inthlauh deuh avangin inkhel hmuhnawm beisei ngam chi a ni lo.

MFA Super Cup final a hmuhnawm ngei a rinawm a, chutiang chiah chuan semifinal hnuhnung zawk hi tualchhung football ngainatute tan chuan hmaih phal loh tur a ni. Inelna buatsaihtute pawhin mipuiin an hlut dawn tih an hria a, ruahmanna hmasaah inkhelh hun dar 11:00-a tih ni mah se zan dar 7:30-ah sawn a ni hial.

Chanmari FC hi S. Malsawmtluanga hnuaiah khelin team enkawltute an phur thar a, Mama hman theih turin player pawh an chhawp sak ṭha hle. Electric Veng erawhin ṭha sa coach Lalsangzuala Hmar an lalut a, coach tawnhriat nei 

ṭha hian player ṭha a chhawm tih hriat a ṭha bawk. MPL club pahnih hi player ṭha nei tura sum hmang tam ve ve an ni a, final khel tur bakah team ṭha zawk nih an inchuh tel ang.

Mama hote hi MPL club dang aiin inbuatsaihna an ṭan hma a, Super Cup-ah hian an ṭhat theih dan berin an inlan tiin a sawi theih. Chanmari FC hian position tinah tawnhriat nei ṭha an kawl vek a, MPL best goalkeeper ni lai Zothanmawia, defender Lalrinchhana Tochhawng, midfielder Rochhingpuia leh forward Lalremruata te bakah danglamna thlen thei David Lalrinmuana, H. Lalmuankima leh Lalnunzama te an kawl.

Electric Veng hian Chanmari ang em chuan player an nei hraw lo a, mah se an coach Sanga hian a hman thiam sa Lalrammawia a chhawm a, tawnhriat nei ṭha Jacob Lalrawngbawla bakah hmabak nei êng Ramhlunchhunga, Vanlalremkima leh C. Lalnunmawia te an kawl bawk avangin Mama hote hneh turin an ṭha tawk.

CYMA Football khelh zawh takah Chanmari Branch YMA an champion a, vengchhung boruak a nung thar leh tawh hle. Electric Veng hi tun hma aṭanga veng leh veng inelnaa sulhnu nei ṭha an ni a, champion thei team an kawl takah chuan ṭawiawmtu pawh an nei ṭha ang.

Vawiin Inkhel Tur

Mizoram Police    02:00 PM    Bethlehem Vengthlang

Chanmari FC    07:30 PM    Electric Veng FC

July 29, Thawhṭanni

Chanmari FC    7 - 1    Mission Veng FC

CFC : Lalrinchhana 20'; Lalremruata 24', 73'; Zakaria Lalhriatpuia 48', 78'; Lalremruata 54'; Lalrammuanpuia 76'

MSV : Daniel Lalhriatpuia 63'

J&C FC Hmunṭha    1 - 11    Electric Veng FC

J&C : Lalbiaknunga 38' (P)

EFC : Ramhlunchhunga 15', 45'; Lalrammawia 20'; C. Lalnunmawia 24' (P); Vanlallawmtluanga 44'; Vanlalremruata 53'; Vanlalremkima 56', 78';  Lalengmawia 76';  David Lalchhuanawma 82', 88'

Mizoram Police    18 - 0    Youngstar FC, Kolasib

MPFC : Lalfakzuala 4', 27', 48', 76', 86'; Lalbiakhlua (Biaktea) 19', 32', 36', 55', 65', 88'; R. Malsawmtluanga 30', 44'; Lalramtharmawia 38';  Lalnunsanga Hnamte 67'; Laldawngliana Colney 73', 75'; Laldinpuia 83'

Dinthar FC    1 - 1    Bethlehem Vengthlang

Penalty Shootout-ah BVT 4-1 in an chak

DFC : C. Lallawmsanga 47'

BVT : C. Ramnunpuia 58'