Sharapova leh Venus tan wildcard

Hmeichhe tennis world number 1 hlui pahnih Maria Sharapova leh Venus Williams te chu WTA Cincinnati tournament-ah an inlan dawn a, inelna buatsaihtu lam chuan player langsar pahnih hi duhsak takin wildcard an pe.

Inelna hi hard court inelna lian US Open inbuatsaihna zinga langsar tak pakhat a ni a, August 12-18 chhunga khelh tur a ni ang. Wildcard pek an nih avang hian an ranking hniam mah se qualifier khelh hah an ngai dawn lo tihna a ni.

Russian nula Sharapova hi tunlai hmeichhe player Grand Slam pali la kim thei mi paruk zinga pakhat a ni a, WTA titles hi 36 ngawt la tawh mah se tun hnaiah a inkhel tam lo. Tunah hian world number 81 niin, inelna liana a hlawhtlin hnuhnung ber chu 2014 French Open daih tawh kha a ni thung.

Damdawi hman phal loh a hmang tih hmuhchhuah a nih avangin thla 15 chhung hrem a ni a, hremna a hman zawh hnuah pawh a dar (shoulder) hliam vangin a buai zui leh, thla li zet a chawlh hnuah Wimbledon khel mah se match khat pawh a khel zo thei lo, a inhnukdawk.

American nula Venus hi kum 39 mi a ni tawh a, WTA nomawi 49 chawi tawhtu hi a vanglai a liam tawh. Mahse, infiamna khawvel mangṭha mai a la tum bik lo, tun dinhmunah world number 51 niin a khelh fuh ni chuan player ṭha zawka ngaih la barakhaih theitu a ni ang.

WTA Cincinnati tournament director Andre Silva chuan, "Maria leh Venus te hi tennis chanchina player ropui tak an ni a, khawvel huap pawha zahpuiawm loh inelna an rawn hmachhawn thei tur hi kan lawm takzet," tiin a sawi.