Volleyball in ngaihhlut a hlawh
Mizoram Volleyball Association (MVA) buatsaih Inter District Volleyball Tournament chu nimin aṭang khan Zuchhip Volleyball Court, Khawzawlah khelh ṭan a ni a, mipui hlut a hlawh hle.
Inelna neih ṭan ni hian mipa champion lai Saitual chuan Kolasib lakah 2-0 in hnehna an chang. Hmeichhe lamah pawh champion lai Aizawl chuan an khingpui Lawngtlai 2-0 bawkin an hneh ve bawk.
Tournament-ah hian district 11 aṭangin team an tel kim. Pool League-a khelh tur niin, mipa leh hmeichhia hi pool A, B, C leh D ah ṭhen a ni a. An inkhelh kual vek hnuah pool tina a sang pahnih zelin quarterfinal an khel ang.
Pool match bakah semifinal leh final nen hian a vaiin match 34 khelh tur a awm dawn a ni. March 5, Zirtawpni hian a hmawr bawkna an nei dawn.
Season hmasa khan hrileng vangin tualchhung volleyball inelna a awm mumal thei lo. Kuminah erawh hrilengin ziaawm lam a pan a, inelna lian leh ngaihhlut ber Pro Volleyball League pawh khelh theih ngei beisei a ni.
Nimin Inkhel Results
Mipa
Aizawl 2 - 0 Mamit
Serchhip 1 - 2 Lunglei
Champhai 2 - 0 Lawngtlai
Saitual 2 - 0 Kolasib
Hmeichhia
Champhai 2 - 0 Lunglei
Saitual 2 - 0 Siaha
Kolasib 2 - 1 Mamit
Aizawl 2 - 0 Lawngtlai