India squad an puang: Lianzuala & Apuia an lang

Indian football team coach Igor Stimac chuan United Arab Emirates (UAE)-a camp nei tur India squad a puang a, player 35 zingah Lallianzuala Chhangte leh Lalengmawia (Apuia) chu Mizo player an ni. 

East Bengal-a beisei phak lo Jeje Lalpekhlua chu squad-a koh zingah a tel lo a, Mizo Sniper hian an league match hnuhnung berah goal khung mah se Igor Stimac hmin turin a tawk zo lo. 

Odisha FC rinrawl Jerry Mawihmingthanga chu mak tak maiin squad-a koh zingah a tel lo a, Chennaiyin defender rinawl Jerry Lalrinzuala koh a ni lo chu thilmak zingah a tel. 

Laldinliana Renthlei leh Ricky Lallawmawma ten Jamshedpur FC tan hmun pawimawh chang phak mah se Stimac-a player duh zingah an tel lo a, Mizo player tan thawhrim lehzual a la ngai tihna a ni.

Mizo Sniper a chuai?

Season hmasa tluanah khup hliam vangin Jeje-a inlan thei lo a, hemi hma season hian hliam nei reng chungin season a hmang tluan bawk - tun season-ah a lo kir a, Jeje a la dam chiang lo. 

Hnahthial tlangval hian 100% fit lo chungin season bul a ṭan a, hei vang hian hmun a chang lawk lo - Jeje hian season tluanin match sarih a khel a, goal khat khungin assist vawi khat a nei hram. 

Jeje hian khelmualah minute 360 bak hun a hmang lo a, India senior team-ah meuh rawn kir leh tur chuan Mizo Sniper hian hun a la mamawh niin a lang. 

Hetihrual hian Odisha laka Jeje-a goal hmutu chuan Chennaiyin legend hi a la 'class' reng tih an hai lo ang tih a rinawm a, a goal khung kha striker naran tana khung chi a ni lo.

Croatia international hlui Stimac-a'n forward-a khel turin Manvir Singh, Sunil Chhetri leh Ishan Pandita a thlang a, Chhetri thiamzia hrilh nawn kan ngai lo a, Manvir leh Pandita hi rin ngam chu an la harsa deuhin a rinawm.

India hian Asia ang pawha team ṭha ni phak Oman (March 25) leh UAE (March 29) chu friendly match-ah a hmachhawn dawn a, an team tum tur an khauh bawk si avangin Indian football hrechiangtu tam tak chuan Jeje koh a ni lo hi mak an ti. 

Kum 25 mi Manvir Singh hian tun season-ah Bagan tan league match 20 khelin goal nga a khung a, assist vawi thum a nei - mahse, India tana vawi 14 inlana goal thum chiah khungtu striker hi Oman leh UAE laka tlangnel viau tura rin chi a ni lo. 

Ishan Pandita hian Goa tan match kua khelin goal li a khung a, khelmuala minute a hman belhkhawm erawh 56 chauh a ni - he striker hian vanneihna a keng tel tih a lang a, Jeje-a hmun ruak chu a luah zo lo ang. 

Tlarhnunga India squad en ila, Jerry, Dinliana leh Ricky-te koh an ni lo hi thilmak angreng tak a ni a, Highlander defender Mashoor Shereef, East Bengal defender Sarthak Golui leh

Hyderabad-a hmun a chan phak loh avanga loan-a FC Goa pantu Adil Khan-te hian ISL-a an khelh dan aṭanga teh chuan India squad-a awm hi an phu lo. 

Jerry Mawihmingthanga'n season hman zawh takah league match 17 khelin goal hnih a khung a, assist vawi nga a nei bawk - mahse, Chanmari tlangval tan India squad-ah hmun a awm chuang lo a, a vanduai takzet. 

Odisha FC star player tan hmun a awm loh lai hian season hmang chhe tak Udanta Singh leh Ashique Kuruniyan erawh squad-ah telh an ni lawi a, Stimac-a'n a duhsak zawng a thlang em ni? tih palh mai awl tak a ni. 

Manipur forward Udanta hian tun season-ah league match 17 khelin goal khat chiah a khung a, assist vawi khat a nei bawk. Ashique hian league match riatah goal leh assist a nei lo - mahse, India squad-ah koh an ni tlat!

Chhenaiyin forward Lallianzuala Chhangte-in a chhe thut a nih loh chuan India squad-ah hmun a chan chhoh zel a rinawm a, Lunglei tlangval tan starting XI beisei ngam a ni ang. 

Tun season ISL-a vawi thum hero of the match ni thei Lianzuala hian league match 20 khelin goal li a khung a, assist vawi khat a nei - kum 23 mi midfielder hian finishing lamah hnathawh belh a la mamawh. 

Tun season ISL-a Indian player langsar ber pawla chhal ngam chu Lalengmawia a ni a, holding midfielder anga a hun tam zawk a hman avangin Apuia hian goal leh assist ngah tawk lo mah se a ṭhatzia hrilh nawn kan ngai lo. 

Lalengmawia hian tun season ISL-ah league match 20 khelin goal khat a khung a, vawi 715 pass-a neihah 75.38% pass dik a  nei a, vawi 90 ngawt tackle a nei bawk - tun season ISL-ah vawi li ngawt hero of the match-a thlan a ni tawh. 

March 15 aṭangin India team hian Dubai khawpuiah camp an nei nghal ang a, player 35 aṭang hian player 28-ah tihhniam leh tur a nih dawn avangin player tin tan ṭan a ngai dawn. 

ISL khelh mekah final chu March 13 khian khelh a ni dawn a, Apuia hian NorthEast United chu final a thlenpui thei a nih chuan chawlh pawh nei hman loin Dubai lamah a liam leh nghal dawn tihna a ni. 

India coach Stimac chuan, "Tu tan pawha kum harsa tak a ni a, player naupang tak tak nen inhmukhawm a, kan hma hun kan thlirlawk thei tur hi ka hlim takzet a ni," a ti. 

Blue Tigers squad-ah hian player langsar zingah  Brandon Fernandes, Rahul Bheke, Sahal Abdul Samad leh Asish Rai  chu hlim vangin koh an ni lo a, Oman leh UAE nena an inkhel tur hi November 2019 hnua India-in international match an khelh leh hmasak ber tur a ni. 

GOALKEEPERS: Gurpreet Singh Sandhu (Bengaluru FC), Amrinder Singh (Mumbai City), Subhashish Roy Chowdhury (NorthEast United), Dheeraj Singh (FC Goa), Vishal Kaith (Chennaiyin FC).

DEFENDERS: Seriton Fernandes (FC Goa), Ashutosh Mehta (NorthEast United FC), Akash Mishra (Hyderabad FC), Pritam Kotal (ATK Mohun Bagan), Sandesh Jhingan (ATK Mohun Bagan), Chinglensana Singh (Hyderabad FC), Sarthak Golui (East Bengal), Adil Khan (FC Goa), Mandar Rao Dessai (Mumbai City), Prabir Das (ATK Mohun Bagan), Mashoor Shereef (Northeast United).

MIDFIELDERS: Udanta Singh (Bengaluru FC), Rowllin Borges (Mumbai City), Lalengmawia (NorthEast United FC), Jeakson Singh 9Kerala Blasters), Raynier Fernandes (Mumbai City FC), Anirudh Thapa (Chennaiyin FC), Bipin Singh (Mumbai City), Yasir Mohammad (Hyderabad FC), Suresh Singh (Bengaluru FC), Liston Colaco (Hyderabad FC), Halicharan Narzary (Hyderabad), Lallianzuala Chhangte (Chennaiyin FC), Ashique Kuruniyan (Bengaluru FC), Rahul KP (Kerala Blasters), Hitesh Sharma (Hyderabad FC), Farukh Choudhary (Jamshedpur FC).

FORWARDS: Manvir Singh (ATK Mohun Bagan), Sunil Chhetri (Bengaluru FC), Ishan Pandita (FC Goa).