Man United khingpui tur Crystal Palace

Selhurst Park-ah zanin dar 1:45 hian Manchester United-in Crystal Palace an hmachhawn dawn. Ole Gunnar Solskjaer-a hote hian nikum September 9 khan Palace hi Old Trafford-ah 3-1 in ngawtin an hneh lo.

Man United mualpho ṭum hian Donny van de Beek-a'n a club thar tana a goal hmasa ber a khung a, Dutch midfielder hian thawm nei lian nghal hat mah se tun thlengin player pawimawh a ni pha lo. Solskjaer-a hote erawhin hma an sawm a, champion tur khawpin ṭha tawk lo mah se Champions League erawh an khelh phak a beiseiawm hle.

Manchester United-in inhliam vangin Paul Pogba, Juan Mata leh Phil Jones te an la chhawr theih a rinawm lo a, Edinson Cavani erawh squad-a a awm theih tawh beisei a ni. Midfielder Scott McTominay a dam tawh a, Chelsea nen goal awm loa an inhnehtawk ṭumin bul a ṭan. 

Ole Gunnar Solskjaer-a'n Palace hneh theihna tur squad a kawl a, chutihrualin Manchester City leh AC Milan te an hmachhawn lehnghal dawn avangin player thlan fimkhur a ṭul dawn. United hian March 7, Pathianni zanah Etihad Stadium an tlawh dawn a, March 11, Ningani zan hian Old Trafford-ah AC Milan an mikhual zui ang.

Player chhawr tam tawk loh Eric Bailly, Alex Telles, Dean Henderson, Nemanja Matic leh Van de Beek te tan Palace lakah khelhna hun ṭha a inhawng thei a, chutihrualin Solskjaer-a'n player pahnih khat tan bak khelhna hun a pek a rinawm loh.

United hian match hnuhnung pakua aṭangin point 14 chauh an hmu a, point 13 tehmeuh an chan avangin hmahruaitu Manchester City lakah point 10 chuangin an hnufual phah a ni.

Man United player hlui Wilfried Zaha chu inhliam vangin match li a khel tawh lo a, Eagles manager Roy Hodgson-a'n an intawn hmasak ṭuma goal hnih khungtu Zaha hi a dam hman a beisei lo. Tlarhnung player pahnih Mamadou Sakho leh James Tomkins te pawh an la inhliam a, winger Jeffrey Schlupp pawh malpui hliam vangin a dinhmun a chiang lo.

Palace hian match hnuhnung pali aṭangin point li an hmu a, Leeds United leh Burnley an hneh loh hnuah insiamṭhain Brighton an hneh a, an match hnuhnung berah Fulham nen goal awm loin an inhnehtawk. Hodgson-a hote hi table-ah 13-naah an awm mek a, an club history-a a vawi khat nan United hi season khat chhungin vawi hnih hneh an tum dawn a ni.

Man United manager Solskjaer-a'n academy player chhawr hriam dan kawng a dap chho zel a, Europa League-a Real Sociedad nen goal awm loa an inhnehtawk ṭum pawhin bench aṭangin Amad Diallo leh Shola Shoretire a luhtir a, bench-ah Ethan Galbraith a awm bawk.

Premier League-ah erawh bench-ah player pakua chiah an ṭhu thei a, chutihrualin result awm dan a zira chhawr theih turin academy player pahnih khat hming a lan a rinawm. Kum 18 mi Amad Diallo-a'n reserve team tan hming a chher viau tawh a, senior team-a rinrawl ni pha tur chuan hmabak a la ngah hle.