Real an tawlhthlu leh tawh!

Spanis La Liga nomawi inchuh boruak a 'hot' chho zel a, Real Madrid chuan hmahruaitu Atletico Madrid nena an inkar sawr zimna remchang an neih chu an bawhpelh. 

Thawhṭanni zan khan Los Blancos hian Champions League khelh tum Real Sociedad an mikhual a, mual neitu mah ni se point thum an hlawh chhuak thei lo a, 1-1 in inkhel a tawp. 

Sociedad hian Portu hmangin goal hmahruai an khung a, Real Madrid tan Vinicius Jr chuan a chhanglet - hun tawp thlengin goal dang a lut tawh lo a, Real-in point khatah lungawi an zir a ṭul.

Real-in hnehna an chan zawh loh avangin table-ah pathumna an nih chhunzawm a, pahnihna Barcelona nen an point hmuh zat a inang. 

Atletico Madrid chuan table chung ber luah chhunzawmin Barca leh Real aiin point ngain an sang mek a, match khatin an khel tlem bawk. 

Real Madrid-in inkhel an thunun zawk a, first half-ah goal khung theihna remchang pawh an nei. Mahse, Mariano leh Raphael Varane-te vanneih zan a ni lo a, an hun ṭha neih chu bar tih per nan ve ve an hmang. 

Toni Kroos leh Marco Asensio pawhin chance duhawm nei ve ve mah se an chhawr thei lo a, chawlhlawk hman a nih hnuah Champions League khelh tum Real Sociedad an hlauhawm sawt bawk. 

Mikhual team hian minute 55-naah mikhual tlangnel zia chhuahin goal an khung ta nge nge a, Arsenal defender hlui Nacho Monreal cross aṭanga ball kal chu Portu chuan ṭha zetin a tauh lut. 

Real defender Ferland Mendy-a'n a tih tur ang a ti tawk lo a, Real goal chhuah chhanah mawh puh theih a ni - Madrid-in na takin an nawr let a, chak loh an duh lo. 

Zinedine Zidane-a'n minute 61-naah Vinicius Junior, Rodrygo leh Hugo Duro te goal nawr turin a luhtir a, French manager hian point hlawh chhuak loa awm a tum lo tih a lang. 

Zidane-a substitution siamin awmzia a nei nghal a, Real goal nawr a na sawt - Casemiro, Duro leh Rodrygo-ten chance duhawm an rawn nei vek a, goal-ah erawh an chantir thei lo ang. 

Hun tawp nan minute khat chiah a awm tawh a, Real tana Vinicius Jr inlar hun a thleng. Brazilian forward hian Lucas Vazquez hnen aṭanga a ball hmuh chu awlsam takin goal-ah a chantir a, Sociedad tlarhnungin an veng ṭha tawk lo. 

Real goal khung a tlai hret a, hnehna chang tura goal dang khungna hun erawh a awm ta lo - Sociedad nen 1-1 in an inhnehtawk a, inelna hrang hranga match nga chhung a zawna an chak tawh chu tihtawpsak an ni. 

Kum 20 mi Vinicius tan erawh Sociedad nena an inkhel hi zan chhinchhiah tlak a ni a, Brazilian club ṭha Flamengo aṭanga Real pantu forward hian Spanish champion tana match 100-a khelh tlinna chiah a ni - a theihnghilh tawh lo ang. 

Vinicius hian tun season inelna hrang hrangah match 31 khelin goal li a khung a, assist vawi li a nei tawh bawk - Real tan match 100-ah goal 12 khungin assist vawi 20-a nei tawh. 

Zidane-a'n chak zawh loh chhuanlam turin  Karim Benzema, Dani Carvajal, Eder Militao, Sergio Ramos leh Eden Hazard-te a la chhawr thei lo vek a, Benzema tel loin Real tlarhma a hriam tawk lo. 

Sociedad lakah Real-in goal an khung lawk loh avangin Zidane-a mangang a, French manager hian second half-ah a team khelh dan thlakin defender pathum hmangin a khel thut - Casemiro chu centre back-ah pawh let a ni. 

Zidane-a'n formation a thlak hnuah Sociedad zawkin goal an rawn khung a, a substitution siam fuh zarah French manager a mualpho zui lo. 

Kum 48 mi coach chuan, "Kan goal nawr dana ka lawm loh avanga formation kha thlak danglam ka ni a, mahse 4-3-3 a kan thlak leh hnu khan kan zia a ni," a ti a, tlarhnunga defender pathum daha formation a thlak chu a tihsual a nih thu a sawi. 

Real hian March 7 zanah Madrid derby khel turin Atletico Madrid an lenchilh zui dawn a, La Liga hmahruaitu hi an hneh thei a nih chuan league nomawi inchuh boruak a 'hot' lehzual ang - Zidane tan thutlukna siamsual chi a ni tawh lo.