Ibrahimovic a inhliam

AC Milan striker Zlatan Ibrahimovic chu Pathianni zana AS Roma 2-1 a an hneh ṭumin minute 56-naah inhliam vangin lakchhuah a ni a, kar thum chhung chawl tura ngaih a ni.

Milan hi Europa League-ah Manchester United nen last 16-a inhmachhawn tur an ni a, Swede striker Ibrahimovic hian a club hlui English club hi a hmachhawn theih a rinawm loh.

Kum 39 mi Ibrahimovic hian malpui vei lamah hliam a tuar a, Milan-in an player pawimawh an chan dawn. Swede striker hian tun season match 21 aṭangin goal 16 a khung a, team tan a la ṭangkai hle.

Ibrahimovic hian Man United kha match 53 a khelhsak a, goal 29 a khungsak. Zlatan hian English club hi Premier League nomawi lakpui thei lo mah se Europa League leh League Cup nomawi a lakpui tho a ni.