Sheffield tan beisei tur a la awm em?

Sheffield United-in season liam taa an chet ṭhat an chhunzawm thei lo a, Premier League khelh mekah table mawngphaha an awm mek avangin relegation zone chhuahsan a har tawh ang.

Blades hian zanin dar 11:30 hian Aston Villa an mikhual dawn a, Premier League-a inham tan an tum a nih chuan chak a ṭul tawh hle. Sheffield hian season liam ta  khan point 54 hmuin pakuana an ni a, tun season-ah erawh point 11 lek an la hmu.

Sheffield hian tun tun season-ah vawi 21 zet an khingpui an hneh lo a, vawi thum chiah chak la neiin vawi hnih an inhnehtawk. Premier League-a inhamtang turin point 40 hmuh a ngai tih ṭhin a ni a, match 26 aṭanga point 11 chauh hmutu Blades hian match 12 aṭangin point 29 an hmuh a ngai dawn tihna a  ni a, a huphurhawm tawh hle.

Chris Wilder-a hote hian Aston Villa lakah point thum an hmu thei lo a nih chuan Blades hi Premier League-a relegate hmasa ber tura ngaih theih an ni ang.