Zaninah Norwich vs Brentford

Zanin dar 11:00 hian Championship inkhel hmuhnawm bik a awm dawn. Carrow Road-ah hmahruaitu Norwich City-in pahnihna Brentford an mikhual ang.

Daniel Farke-a kaihhruai Norwich hian February 5-a Swansea City an hneh loh hnuah match nga an chak zawn leh tawh a, champion tura rinkai an ni. Norwich tan hian Teemu Pukki a langsar a, goal 18 tehmeuh a khung tawh.

Europe club langsarte pawhin an enthlak Argentine midfielder Emi Buendía-a'n goal kua a khung tawh bawk. Chutihrualin Brentford hi dah hniam theih an ni lo. Season liam taa vanduai Brentford hi vawi thum an chak loh zawn hnuah vawi hnih a zawnin an chak leh tawh.

Norwich-in goal 18 khungtu Teemu Pukki an chhuang a nih chuan Brentford-in goal 25 khung tawh Ivan Toney an kawl. Newcastle United tan pawha khel tawh kum 24 mi Toney hian a club thar Brentford tan hming a chher a, chutihrualin season hnuhnung pahnihah Peterborough United tan goal 24 leh 16 a khung avangin vanneih vanga che ṭha ringawt chu a ni lo.