ICC World Test Championship Final thleng turin India dinhmun a ṭha

ICC World Test Championship hmasa ber chu August 1, 2019 aṭang khan khelh ṭan a ni a, final hi kumin June 18-22 chhung hian Lord's, London-ah khelh a ni ang. Inelna hi a hranpaa khelh a ni lo a, August 1, 2019 aṭang khan Test match khel ram hrang hrangte inkhel result chu chinchhiah zel a ni a, a ti ṭha pahnihin final an khel dawn.

New Zealand chu final khel turin an tling tawh a, India leh Australia ten final an la lut thei bawk. Men in Blue hian third Test-a England an hneh khan Three Lions final thlen beiseina a tawp a, final lut turin an dinhmun a ṭha sawt bawk.

Virat Kohli-a hote hian March 4-8, 2021 hian Ahmedabad, Gujarat-ah England nen fourth Test an khel dawn a, hnehna an chan emaw an inhnehtawk emaw chuan ICC World Test

Championship final hmasa ber khel turin an tling ang. India hian final an thleng a nih chuan Asia Cup a nghawng dawn a, Pakistan Cricket Board (PCB) chairman Ehsan Mani chuan,

"Sri Lanka-in June thlaah inelna hi thlen an duh a, India-in Test Championship final an thleng a nih chuan Asia Cup hi kum 2023-ah sawn a ṭul thei ang," tiin a sawi.

Asia Cup hi nikuma neih tum kha ni mah se Covid-19 vangin kuminah sawn a ni a, ICC World Test Championship vangin sawn leh theih dinhmunah a ding.