Harden hoin Nets an chak
James Harden-a point 30 neih hmangin Brooklyn Nets chuan San Antonio Spurs 124-113 in an hneh a, hun rei tak chhung hnehna an chan theih lohna San Antonio mualah ngei an chak ve leh ta.
Nimin zing NBA regular season inkhelah team pahnih an inbei tawk hle, hun pangngaiah an inhnehtawk. Over time an khelh chinah Nets an danglam; OT bikah hian point riat an nei fal nghal a, a tawp thlengin an hawikir tawh lo.
Harden-a'n point a neih hnem bakah assist vawi 15 leh rebound vawi 14 a la bawk. 2002 January 22 hnua a vawi khat nan San Antonio-ah Nets hian hnehna an chang ve leh ta, match 17 hnuah an chak ve leh chiah tihna a ni.
Tun hnaiah Nets an kaltluang, regular season bika match an khelh hnuhnung 10 aṭangin vawi kua ngawt hnehna an chang thei. Eastern Conference lamah pahnihna dinhmun luahin NBA champion nih an tum zel.
Inkhel dangah Philadelphia 76ers chuan Indiana Pacers 130-114 in an hneh. Harden-a team hlui Houston Rockets erawh Cleveland Cavaliers lakah 101-90 in an tlawm a, tun hnaiah match 12 chhung an tlawm ta - kum 2001 hnua season an hman chhiat ber ṭum an tawng.
NBA Results
Brooklyn Nets 124 - 113 San Antonio Spurs
New Orleans Pelicans 129 - 124 Utah Jazz
Portland Trail Blazers 123 - 111 Charlotte Hornets
Dallas Mavericks 130 - 124 Orlando Magic
Cleveland Cavaliers 101 - 90 Houston Rockets
Philadelphia 76ers 130 - 114 Indiana Pacers
Denver Nuggets 118 - 114 Chicago Bulls