Djokovic-a'n Federer a nihrual

Tennis khawvel hi Roger Federer leh Rafael Nadal te ta chauh a ni bik lo a, tunah chuan Novak Djokovic hming lamrik tel zel a ngai dawn ta. World number 1 nih rei lamah phei chuan Serbian tlangval hi a chungnung ber dawn.

Mipa tennis thuneitu sang Association of Tennis Professionals (ATP) in ranking thar a tih chhuahah Djokovic chu a chung berah awmin, chawlhkar 320 zet pakhatna a ni ta - number 1 nih rei lamah Federer a nih rual chiah.

Nikum khan Covid-19 vangin hun rei tak an inkhel thei lo, tournament khelh loh chhung hian an ranking chu tihtawp (freeze) lailawk vek a ni. Djokovic-a'n record a siamna hun tur hi hrilengin a pawt khawtlai viau a, ranking chhuak tharah erawh Swiss star hi a khum chiah ang.

Djokovic hian nikum February thla khan Nadal hnen aṭangin number 1 nihna a chhuhsak a, a chung berah a vawi nga lawmna chiah a ni. Number 1 ni chungin a vawi ruk nan season a khar zui bawk, hranghlui Pete Sampras nen an record a intluk chiah.

Tun dinhmunah Djokovic-a'n point 12,030 a nei a, amah hnaih bertu Nadal aiin point 2,000 chuangin a sang zawk - pathumna Daniil Medvedev leh Dominic Thiem te phei chuan an hlat hle, a chesual viau a nih loh chuan number 1 ni chunga kum tawp hman tam lamah Sampras pawh a khum ngei ang.

A zawna number 1 nih rei theih zawngah erawh Federer khum thei an awm dawn lo niin a lang. Swiss star hian chawlhkar 237 chhung zet a zawnin pakhatna dinhmun a luah thei. Hemi kawngah hi chuan Djokovic-a'n (122 weeks) a phak lo hle.

Tunge tennis player ropui ber ni ang? (Greatest Of All Time) tih hi zawhna awm reng, a chhanna dik leh pawm tlan ber tur awm si lo a ni. Inelna ngaihhlut Grand Slam champion hnem ber chu mi tam takin player ropui berah an ngai dawn.

Kum 39 mi Federer leh Nadal (34 years) ten major title 20 ve ve an la tawh. Australian Open 2021 a lak leh chiah khan kum 33 mi Djokovic-a'n nomawi lian 18 a la tliang ve ta chiah, a chunga mite phak turin hun a nei ṭha hle a ngaih a ni.

May thlaa French Open an khelh zawh meuh chuan Nadal hi a chung berah a awm mai a rinawm. Chutih rualin Wimbledon leh US Open-ah hliam nei loa Federer a inlan thei a nih chuan engkim a la danglam thei, player pathum inelna hi a la ngaihnawm chho zel dawn.