Everton chakna Richarlison

Carlo Ancelotti enkawl Everton chuan hma an sawn zel. Thawhlehni zan Premier League inkhelah Toffees hian Southampton 1-0 in an hneh a, season tharah European football khelh ngei an la beisei chhunzawm.

Goodison Park a inkhelah Richarlison chuan minute kuana lekah goal awmchhun a khung, goal dang neih belh lo mah se an tlarhnung an chetsual duh loh avangin point thum hlu tak an hlawh chhuak.

Ancelotti naute hian Ningani zanah West Brom an hmachhawn zui leh nghal dawn, hnehna an chang a nih chuan khelh zat inangah an hmelma Everton leh Chelsea khumin palina dinhmun an luah thei dawn a ni.

Chak duh Everton lamin goal an nei har lo. Keeper Jordan Pickford ball pet chhuah chu striker Dominic Calvert-Lewin-a'n a lo tauh tla a, midfielder Gylfi Sigurdsson-a'n chang zuiin Saints player pathum karah mawi takin a lir lut.

Sigurdsson-a through ball duhawm umtu Richarlison chuan keeper Fraser Forster tlan khalhin, rang taka ball a lak khalh hnuah goal ṭha bik a khung. Brazilian forward hian season kal laiah goal 11 a khung tling ta chiah a, team chakpui nan a tawk bawk.

Toffees defender Michael Keane-a'n an goal hnihna khungah inngai mah se VAR hman a nih hnuah offside vangin an hnawl . Saints lamin si phurh sut theihna remchang nei mah se Pickford chuan Jannik Vestergaard leh Danny Ings te khung tur chu ṭha takin a dansak a ni.

Match khelh hmabak a la tam a, thil tam tak a la thleng thei - chutiang karah chuan Everton tan Champions League beisei ngam a ni. Ancelotti chuan, "Hun remchang leh ṭha chu kan nei ngei mai, eng tianga hla leh thui ngei tih erawh ka sawi thei lo.

"Inkhel zawng zawngah theihtawp tak meuh kan chhuah zel a ngai dawn, hun pawimawh zual bik kan thlen tur hian eng anga ṭha nge kan nih chu a takin a rawn ti fiah dawn bawk a ni," tiin an hmabak a la hautak thu a sawi tel bawk.

Everton hian an khelmual an hmang thiam tawk lo a, sawisel an hlawhna pawh a ni. Goodison Park-ah league match an khelh hnuhnung pathumah chak ni hmel an hmu lo a, tunah erawh an duh ang chak ni hmel an hmu ve leh ta.

January 4 khan Southampton hian Liverpool an hneh a, league table-ah parukna niin khatih laia palina Tottenham nen an point neih a inzat. Mahse, Reds an hneh hnua match kua an khelh leh aṭangin point khat chauh an hlawh chhuak - tlak hlauhthawnawm zingah an awm leh der tawh.

Season pawimawh laiin Oriol Romeu a inhliam a, atan season a tawp zui bawk. Ani bakah hian tun hnaiah Takumi Minamino, Kyle Walker-Peters leh Theo Walcott ten hliam an tuar, chutih rualin Vestergaard vanneih zan ni se chuan Everton lakah point an hlawh chhuak ang.

Saints manager Ralph Hasenhuttl chuan, "Goal khung loh chuan hnehna a chan theih loh, point hmu tur chuan pet goal a ngai. Kan chak loh zawn rei tak avangin sawisel kan hlawh, amaherawhchu kan tho chhuak leh ngei ang tih ka ring tlat," a ti.