UK sorkarin 2030 World Cup thlen a duh

British prime minsiter Boris Johnson chuan United Kingdom leh Republic of Ireland ten 2030 World Cup thlen ṭawm a thlawp a, hmalak hun tak a nih thu a sawi.

Vawiina budget chungchang sawi hunah UK sorkar hian World Cup thleng tura beihpui thlak nan pound maktaduai 2.8 dah tel an tum. England, Wales, Scotland, Northern Ireland leh Ireland a football association ten sorkar inpekna chu lawmawm an tih thu an sawi.

Kum 56 mi Boris Johnson chuan, "Kum 2030-a football hruai haw hi ka tumruh hle. Football inelna ropui hmuh kan duh a ni," tiin World Cup thlen tuma hma an lak tur thu a sawi.

World Cup thlen dilna thehluh hma hian zirchianna an la nei hmasa dawn. "Kum 2030 World Cup thleng tura football ram panga thawhona UK sorkarin min thlawp hi kan hlawm hle.

FIFA-in kum 2022-a dilna thehluh hun a hawn hmain FA chuan zirchianna a nei hmasa ang. FIFA World Cup thlen hian ram tana hmasawnna nasa tak a keng tel a, thutlukna siam fel a nih hunah chuan FIFA leh football chhungkua hmaa tlangzarh tur hmachhawp ṭha tak kan nei ang," tiin ram panga England, Wales, Ireland, Northern Ireland leh Scotland te chuan thuchhuah inṭawm an siam.

England hian kum 2018 khan prime minister hlui David Cameron bakah Prince William leh captain hlui David Beckham te hoin World Cup thlen tumin hma an la a, Russia an tluk ta lo. Kum 2026 aṭangin World Cup-ah team 48 an tel tawh tawh dawn a; US, Canada leh Mexico ten an thleng ang.

Kum 2030 inelna hi Chile, Argentina, Paraguay leh Uruguay te ṭangkawpin thlen ṭawm an tum a; Spain, Morocco leh Portugal te pawhin a huhoin thlen an tum. United Kingdom leh Republic of Ireland ten elpui an nei dawn tih a chiang a, World Cup hmuhnawm ang thoin thlen tuma inchuhna pawh a ngaihnawm ang.